Avropa İnsan Haqları Məhkəməsi (AİHM) Gürcüstanın keçmiş prezidenti Mixail Saakaşvilinin ölkənin hazırkı hakimiyyətini siyasi motivlərlə təqib etməkdə ittiham etdiyi iki şikayətini tamamilə rədd edib.
Bizimyol.info xəbər verir ki, qərar məhkəmənin saytında dərc olunub.
Dərc edilmiş hökmə əsasən, Saakaşvili 2018-ci il yanvarın 5-də və iyunun 28-də ona qarşı çıxarılan hökmlərin “təsdiqlənməmiş şayiələrə və digər etibarsız sübutlara əsaslandığını” iddia edib. Eyni zamanda o, hesab edir ki, onun işinə baxan hakim müstəqillik və qərəzsizlik meyarlarına cavab verməyib. O, həmçinin bildirib ki, “prezidentin ona həvalə edilmiş əfv səlahiyyətinin həyata keçirilməsinin cinayət məsuliyyətinə səbəb ola biləcəyini qabaqcadan görə bilməz”.
Söhbət onun bankir Sandro Qirqvlianinin qətli və keçmiş deputat Valeri Gelaşvilinin döyülməsi ilə bağlı səs-küylü işlərdə mühakimə olunan Daxili İşlər Nazirliyinin yüksək rütbəli zabitlərini əfv etmək qərarı ilə bağlı çıxardığı hökmə aiddir.
“Ərizəçi həmçinin şikayət edib ki, hakimiyyətin gizli məqsədi siyasi təqibə məruz qalmaq məqsədi ilə ona qarşı, Avropa İnsan Hüquqları Konvensiyasının 6 və 7-ci maddələri ilə birlikdə oxunan 18-ci maddəsini pozaraq cinayət hüququ mexanizmindən istifadə etməkdir”, - deyə iş materialında qeyd edilir.
18-ci maddə “hüquqların məhdudlaşdırılmasının tətbiqi hüdudlarını” tənzimləyir, 6-cı və 7-ci maddələr müvafiq olaraq “ədalətli məhkəmə araşdırması hüququnu” və “yalnız qanuna uyğun olaraq cəzalandırma”nı tələb edir.
“Məhkəmə yekdilliklə AİHM-in 18-ci maddəsinə əsasən iddiaçının həm 6232/20, həm də 22394/20 saylı şikayətlərini qəbuledilməz elan edib. 6 və 7-ci maddələr üzrə iddialar da eyni şəkildə rədd edildi”, – deyə qərarda bildirilib.
Saakaşvili 2004-2013-cü illərdə Gürcüstana rəhbərlik edib. Səlahiyyətləri başa çatdıqdan sonra barəsində 4 cinayət işi başlanıb, onlardan ikisi artıq məhkumluqla nəticələnib. 2018-ci ildə Tbilisi Şəhər Məhkəməsi Saakaşvilini bankir Sandro Qirqvlianinin qətlində təqsirli bilinərək qiyabi olaraq üç il müddətinə azadlıqdan məhrum edib. Elə həmin il deputat Valeri Gelaşviliyə hücuma görə 6 il həbs cəzasına məhkum edilib.
2021-ci ilin oktyabrında Saakaşvili gizli şəkildə Gürcüstana gəlib, lakin saxlanılıb. Oktyabrın 20-də Saakaşviliyə qarşı Gürcüstan Cinayət Məcəlləsinin 344-cü maddəsi (“Gürcüstan dövlət sərhədini qanunsuz keçmə”) ilə cinayət işi açılıb. Bu cinayət beş ilə qədər həbs cəzası nəzərdə tutur. 2022-ci ilin mayında səhhəti pisləşdiyi üçün o, Tbilisinin özəl “Vivamed” klinikasına aparılıb və bu günə kimi oradadır.
Qadir, Bizimyol.info
