Bir qrup konqresmen ABŞ-ın müdafiə naziri Lloyd Ostini Ukraynaya silah tədarükünü sürətləndirməyə və həmçinin Rusiyanı Amerika silahları ilə vurmağa icazə verməyə çağırıb.
Bizimyol.info xəbər verir ki, Pentaqonun rəhbərinə müraciət Amerika Birləşmiş Ştatlarının Nümayəndələr Palatasının Kəşfiyyat Komitəsi tərəfindən "X" mikrobloqunda dərc olunub. Konqresmenlər Ukraynadan gələn bir sıra təcili müraciətləri dəstəkləmək istədiklərini bildirirlər.
Beləliklə, onlar Pentaqonu “müəyyən şəraitdə” Ukrayna ordusuna Rusiya ərazisindəki strateji hədəflərə zərbələr endirmək üçün Amerika silahlarından istifadə etməyə icazə verməyə çağırırlar.
“Ukrayna rəsmiləri həftələrlə rus qoşunlarının Rusiya ərazisindən Ukraynanın yaşayış məntəqələrinə hücumunu cəzasız olaraq izlədilər. Ukraynalılar indiki administrasiyanın siyasətinə görə özlərini müdafiə edə bilmirlər. Bayden administrasiyasının Ukraynanın hərbi rəhbərlərinə Rusiyanın suveren torpaqlarına səbəbsiz hücumuna cavab vermək üçün lazım olan bütün əməliyyatları həyata keçirmək səlahiyyəti verməsi vacibdir”, - deyə müraciətdə qeyd edilir.
Onlar həmçinin Amerika "F-16" qırıcılarını idarə etmək üçün daha çox ukraynalı pilota təlim keçməyə çağırırlar. ABŞ Hərbi Hava Qüvvələrinin məlumatına görə, bu ilin sonuna qədər bu cür təlimləri bitirmiş yalnız 12 ukraynalının ABŞ-a buraxılması planlaşdırılır.
“Bu, sadəcə olaraq kifayət deyil. Ukrayna müharibə vəziyyətindədir və Ukrayna üçün yerlər digər xarici ölkələrlə müqayisədə üstünlük təşkil etməlidir”, - deyə konqresmenlər vurğulayıblar.
Onlar xatırladıblar ki, müttəfiqlər Ukrayna ərazisini Rusiyanın raket hücumlarından qorumaq üçün yeddi ədəd əlavə "Patriot" batareyası tələb ediblər. Məktubda həmçinin qeyd olunur ki, Ukrayna ordusuna yardım qeyri-kafi miqdarda və vaxtında alınmır ki, bu da cəbhədəki çətin vəziyyəti daha da gərginləşdirir.
“Ukrayna rəsmiləri vəziyyətin indi həmişəkindən daha pis olduğunu bildirərək ciddi narahatlıqlarını ifadə edirlər. Ukraynadakı dostlarımız öz ərazilərini Rusiyanın qəddar hücumundan və təcavüzündən müdafiə etməyə davam etdiyi üçün resurslarla təmin olunmasını sürətləndirməkdə bizə qoşulmağınızı xahiş edirik”, - deyə müraciətdə bildirilir.
Bundan əvvəl "Bloomberg" Rusiya Federasiyası ərazisinə Amerika silahları ilə zərbə endirilməsinin qadağan edilməsindən bəhs edən məqalə dərc edib. Bu səbəbdən Ukrayna ordusu Rusiya Federasiyasındakı sursat anbarlarına və komanda məntəqələrinə zərbələr endirmək, həmçinin Rusiya təyyarələrini vurmaq üçün "HIMARS"dan istifadə edə bilməz.
ABŞ-ın müdafiə naziri Lloyd Ostin bu qadağaya münasibət bildirərək deyib ki, ukraynalılar dövlətlərdən alınan silahlardan “yaxın döyüşdə” istifadə etməlidirlər.
Qadir, Bizimyol.info
