Gürcüstan prezidenti Salome Zurabişvili Gürcüstan parlamentinin üçüncü oxunuşda qəbul etdiyi “Xarici təsirin şəffaflığı haqqında” qanuna veto qoyub.

Bizimyol.info xəbər verir ki, Zurabişvili bu barədə brifinqdə bildirib.

“Bu gün mən “Rusiya qanunu”na veto qoydum. Bu qanun öz mahiyyətinə və ruhuna görə rus qanunudur. Bu, bizim konstitusiyamıza və bütün Avropa standartlarına ziddir və buna görə də bizim Avropa yolumuza maneədir. Bu veto hüquqi baxımdan düzgündür və bu gün parlamentə təqdim olunacaq. Bu qanun heç bir dəyişiklik və ya təkmilləşdirməyə məruz qalmır, ona görə də veto çox sadədir. Bu qanun ləğv edilməlidir", - deyə o qeyd edib.

Mayın 14-də Gürcüstan parlamenti “Xarici təsirin şəffaflığı haqqında” qanunu üçüncü oxunuşda qəbul edib və bu qanun Aİ-nin ölkənin Avropa İttifaqına inteqrasiyasını dayandırmaq təhlükəsi ilə bağlı sərt bəyanatlarına səbəb olub. Hələ qanunun qəbulundan əvvəl Zurabişvili ona veto qoyacağını bildirmişdi. Prezidentin bunu etmək üçün mayın 28-dək vaxtı vardı. Bundan əvvəl Gürcüstanın baş naziri İrakli Kobaxidze bəyan etmişdi ki, prezidentin təqdim etdiyi əsaslandırılmış fikirlər məqbul olarsa, parlament vetonu dəstəkləyə bilər. Bununla belə, Zurabişvili qeyd edib ki, qanunu “nacibləşdirmək” mümkün olmadığı üçün düzəlişlər etməyəcək.

“Xarici təsirin şəffaflığı haqqında” qanun layihəsinə aprel ayında baxılmağa başlanıb. O vaxtdan Gürcüstanda genişmiqyaslı etiraz aksiyaları keçirilir. Bir neçə dəfə onlar təhlükəsizlik qüvvələri ilə toqquşmaya çevrilib. Qanuna ABŞ, Aİ, BMT, NATO, ATƏT və Avropa Şurası etiraz edib. Avropa liderləri bu qanunun Avropa dəyərlərinə zidd olduğunu deyirlər. Gürcüstanın hakim partiyasının liderləri iddia edirlər ki, bu, yalnız qeyri-hökumət sektorunun və medianın xaricdən maliyyələşməsinin şəffaflığının təmin edilməsi məqsədinə xidmət edir.

Qadir, Bizimyol.info