İsrailin baş naziri Benyamin Netanyahu hərbi kabinet iclasında yəhudi dövlətinin ABŞ-ın vassalı olmadığını vurğulayıb.

Bizimyol.info xəbər verir ki, bu barədə Amerikanın "Axios" portalı məlumat yayıb.

Mənbələrinin, o cümlədən Netanyahunun köməkçilərindən birinin verdiyi məlumata görə, İsrailin baş naziri deyib: “Biz ABŞ-ın vassal dövləti deyilik”. Bu, Amerika prezidenti Co Baydenin Qəzza zolağının Rəfah şəhərində böyük hərbi əməliyyat olacağı təqdirdə ABŞ-ın İsrailə silah tədarükünü dayandıracağını deməsindən sonra baş verib.

Portalın mənbələri Netanyahu və Yəhudi Dövlətinin Strateji Planlaşdırma Naziri Ron Dermerin Baydenin qərarına və onun “ictimai ultimatumuna” təəccübləndiklərini açıqlayıb. Nəşr qeyd edir ki, Bayden və digər ABŞ rəsmiləri əvvəllər Netanyahu və Dermerə qapalı məsləhətləşmələrdə silah tədarükünün dayandırılmasının mümkünlüyü barədə xəbərdarlıq ediblər. Dermer Netanyahunu əmin edib ki, ABŞ rəhbərliyi belə bir addım atmağa cəsarət etməyəcək.

Bayden mayın 8-də "CNN" telekanalına müsahibəsində deyib ki, ABŞ Rəfahda böyük hərbi əməliyyat olacağı təqdirdə İsrailə silah tədarükünü dayandıracaq. Həmin gün ABŞ-ın müdafiə naziri Lloyd Ostin izah edib ki, Vaşinqton Rəfah ətrafındakı vəziyyətlə əlaqədar İsrailə qısamüddətli hərbi yardımın bəzi növlərini nəzərdən keçirir. Onun açıqlamalarından belə çıxır ki, xüsusən də yüksək güclü bombaların tədarükü dayandırılıb. ABŞ Dövlət Departamenti bildirib ki, İsrailə yalnız bir dəstə döyüş sursatı göndərilməsi dayandırılsa da, digər hərbi təchizatlara da yenidən baxılır.

Qadir, Bizimyol.info