Böyük Britaniyanın Tiflisdəki səfirliyi Gürcüstan hakimiyyətini xarici agentlər haqqında qanuna etiraz aksiyası iştirakçılarının döyülməsi və telefonla hədələnməsi hallarının artmasının qarşısını almaq üçün tədbirlər görməyə çağırıb.
Bizimyol.info xəbər verir ki, bu barədə Gürcüstandakı Böyük Britaniya səfirliyinin mətbuata açıqlamasında qeyd edilib.
“Birləşmiş Krallıq Gürcüstan hökumətini etirazları dəstəkləyən insanlara qarşı qeyri-qanuni hədə-qorxuları dayandırmaq və mümkün pozuntuları araşdırmaq üçün təcili tədbirlər görməyə çağırır. Hədələyici telefon zəngləri, qanunsuz həbslər, döyülmələr və vətəndaş cəmiyyəti üzvlərini satqın adlandıran plakatların demokratik cəmiyyətdə yeri yoxdur”, - deyə səfirli bildirib.
"Son günlər Tiflisdə etiraz aksiyalarının iştirakçılarının və təşkilatçılarının gecə gec saatlarında üzləri görünməməsi üçün tibbi maska taxmış naməlum şəxslər tərəfindən evlərinin qarşısında döyülməsi halları tez-tez baş verir. Vətəndaşlara naməlum nömrələrdən, o cümlədən xarici nömrələrdən təhdid və təhqir edən zənglər gəlir. Daxili İşlər Nazirliyi bu hallara münasibət bildirmir", - deyə qeyd edilib.
Mayın 1-də Gürcüstan parlamenti “Xarici təsirin şəffaflığı haqqında” qanun layihəsini ikinci oxunuşda dəstəkləyib. Ölkə prezidenti Salome Zurabişvili, müxalifət və Qərb diplomatları onun əleyhinə çıxış edərək, onu respublikanın Avropa İttifaqına inteqrasiyasına əngəl hesab edirdilər. ABŞ Dövlət Departamenti qanun layihəsinin ölkənin canlı vətəndaş cəmiyyətini sarsıtmaq məqsədi daşıdığını bildirib. “Gürcü Arzusu – Demokratik Gürcüstan” partiyasının liderləri iddia edirlər ki, qanun yalnız qeyri-hökumət sektorunun və medianın xaricdən maliyyələşdirilməsinin şəffaflığına xidmət edir.
Aprelin 15-dən Tiflisdə müxalifət və vətəndaş fəalları xarici agentlər haqqında qanunun qəbuluna qarşı mitinqlər keçirir. Bir neçə dəfə nümayişlər təhlükəsizlik qüvvələri ilə toqquşmaya çevrildi; xüsusi təyinatlılar Gürcüstan parlamenti yaxınlığında etirazçıları dağıtmaq üçün bibər qazı və su şırnaqlarından istifadə etdilər. Mitinqlərdən birində etirazçılar parlamentin darvazalarını silkələmək istəyərkən, jurnalistlərin sözlərinə görə, xüsusi təyinatlılar rezin güllələrdən atəş açıblar. Lakin Daxili İşlər Nazirliyi bu məlumatı təkzib edib.
Qadir, Bizimyol.info
