Gürcüstan parlamentinin Hüquq Məsələləri Komitəsi xarici agentlər haqqında qanun layihəsinə ikinci oxunuşda baxmağa başlayıb.

Bizimyol.info xəbər verir ki, Gürcüstan mətbuatının verdiyi məlumata görə, komitənin iclası qanunverici orqanın saytında canlı yayımlanır.

Spiker parlament çoxluğunun lideri Mamuka Mdinaradzedir. İclasda müxalifət nümayəndələri də iştirak edir. Reqlamentə əsasən, deputatlar ikinci oxunuşda qanun layihəsinə bənd-bənd baxacaq və zəruri dəyişikliklər edəcəklər.

Təxribatların qarşısını almaq üçün parlamentdə sarı təhlükəsizlik səviyyəsi elan edilib. Komitənin iclasında yalnız telekanalların nümayəndələri buraxılıb. Digər jurnalistlərin binaya girişi müvəqqəti olaraq dayandırılıb. Hüquq Məsələləri Komitəsi qanun layihəsini təsdiqlədikdən sonra plenar iclasda səsə qoyulacaq. Onun keçirilməsinin dəqiq tarixi hələ müəyyən edilməyib.

Aprelin 17-də Gürcüstan parlamenti “Xarici təsirin şəffaflığı haqqında” qanun layihəsini birinci oxunuşda təsdiqləyib. Bu qanuna ölkə prezidenti Salome Zurabişvili, müxalifət və Qərb diplomatları etiraz edib, həmçinin bunu respublikanın Avropa İttifaqına inteqrasiyasına maneə kimi qiymətləndiriblər. Aprelin 15-dən Tbilisidə müxalifət və vətəndaş fəalları qanun layihəsinə qarşı mitinqlər keçirir.

Bir neçə min insanın iştirak etdiyi belə aksiyalardan biri bazar günü keçirilib və tədbir sonda polislə toqquşmaya çevrilib. Hüquq-mühafizə orqanlarının əməkdaşları bibər qazından istifadə etməli olublar. Qarşıdurmalar zamanı Gürcüstanın Avropa və Avroatlantik strukturlara inteqrasiya üzrə keçmiş dövlət naziri Aleksey Petriaşvili saxlanılıb.

Qadir, Bizimyol.info