Tbilisidə parlament binası yaxınlığında gənclər təşkilatlarının və tələbələrin yüzlərlə nümayəndəsi ölkənin qanunverici orqanında baxılan xarici agentlər haqqında qanun layihəsinə qarşı etiraz aksiyası keçirib.
Bizimyol.info xəbər verir ki, bu barədə məlat yerli telekanallar tərəfindən verilib.
Etirazçılar Rustaveli prospektində parlamentin qarşısındakı səkidə plakatlar, həmçinin Gürcüstan və Avropa İttifaqının bayraqları ilə toplaşıblar. Onlar hakimiyyəti bu qanunu qəbul etməməyə çağırırlar, çünki bu, ölkənin Avropaya inteqrasiya maraqlarına ziddir. Mitinqdə nə səhnə, nə də çıxışlar var. Nümayişçilər Tbilisinin küçələrindən biri ilə yürüş etməyi planlaşdırdıqlarını deyirlər.
Gənclərin mitinqindən əvvəl gün ərzində Tbilisidə qadınların yürüşü keçirilib. Qadın hüquqları sahəsində fəaliyyət göstərən qeyri-hökumət təşkilatlarının nümayəndələri Birinci Respublika Meydanından təxminən bir kilometr aralıda yerləşən Parlament binasına doğru yürüş təşkil ediblər. Etirazçılar xarici agentlər haqqında qanunun qəbulunun da əleyhinə olduqlarını bildiriblər.
Aprelin 17-də Gürcüstan parlamenti plenar iclasda birinci oxunuşda xarici agentlər haqqında qanun layihəsini təsdiqləyib. Gürcüstan prezidenti Salome Zurabişvili, müxalifət və Qərb diplomatları bunu respublikanın Avropa İttifaqına inteqrasiyasına maneə kimi qiymətləndiriblər. Bazar ertəsindən müxalifət və vətəndaş fəalları Tbilisidə qanun layihəsinə qarşı mitinqlər keçirirlər. Etirazlar bəzən polislə toqquşmaya çevrilir. Hüquq-mühafizə orqanları etirazçıları saxlayır.
Aprelin əvvəlində hakim "Gürcü Arzusu - Demokratik Gürcüstan" partiyası "Xarici təsirin şəffaflığı haqqında" qanun layihəsini yenidən parlamentə təqdim etmək qərarını elan edib. Bu, oxşar təşəbbüsün kütləvi etirazlara səbəb olmasından və hakimiyyəti qanun layihəsindən imtina etməyə məcbur edəndən bir il sonra baş verib. “Xarici təsir agenti” ifadəsi istisna olmaqla, onun mətni ötən il olduğu kimi qalır. Əvəzində dəyişiklikdə “xarici gücün maraqlarını güdən təşkilat” anlayışı işlədilib.
Qadir, Bizimyol.info
