İslamabad Qvadar şəhərindən (cənub-qərbi Bəlucistan əyaləti) İran sərhədinə qədər 800 km uzunluğunda qaz kəmərinin tikintisinə sadiq qalır və layihəni həyata keçirmək üçün çalışır.

Bizimyol.info xəbər verir ki, bu barədə bazar ertəsi Pakistanın müdafiə naziri Xavaca Asif bildirib.

“Pakistan İranla qaz kəməri layihəsini tamamlaya bilir və bu istiqamətdə işləyir. Biz öz ərazimizdə Qvadardan İran sərhədinə qədər qaz kəməri çəkirik”, - deyə "Geo TV" kanalı onun sözlərinə istinadən məlumat verib.

Aprelin əvvəlində “The News” qəzeti ABŞ-ın müqavimətinə baxmayaraq, Pakistanın Qvadar şəhərindən İran sərhədinə qədər olan 800 km-lik qaz kəmərinin tikintisinə başladığını yazıb.

Pakistan hakimiyyətinin daha əvvəl bəyan etdiyi kimi, bu qaz arteriyasının tikintisi və istismara verilməsində gecikmələr səbəbindən 18 milyard dollarlıq cərimədən yayınmaq üçün kəmər hissəsinin tikintisinə başlanılması sürətləndirilib. Pakistanın dövlətə məxsus "Interstate Gas Systems" şirkəti ilə İranın İran Qaz Şirkəti qaz kəmərinin tikintisinə dair sazişi hələ 2009-cu ildə imzalayıb. Pakistan yerüstü keçidin öz hissəsini 2015-ci ilin yanvarına kimi tikməyi öhdəsinə götürüb, lakin onun tikintisi başa çatmayıb, İran İslam Respublikası ilə sərhədə qədər olan hissəsi isə artıq istismara hazırdır.

2023-cü ilin avqustunda İslamabad Tehrana fors-major hallar barədə bildiriş göndərib və bunun nəticəsində ABŞ-ın İrana qarşı sanksiyaları qüvvədə qaldığı və ya Vaşinqtondan qaz kəmərinin tamamlanması üçün icazə alana qədər enerji layihəsi üzrə öhdəliklərini dayandırıb.

Tehran buna cavab olaraq layihə üzrə öhdəlikləri yerinə yetirmədiyinə görə İslamabada qarşı 18 milyard dollarlıq iddia ilə beynəlxalq arbitraj məhkəməsinə müraciət edəcəyi ilə hədələyib. Fevralın 27-də Pakistanın müvəqqəti federal hökuməti qaz kəmərinin öz hissəsinin tikintisini bir il ərzində başa çatdırmaq qərarına gəlib.

Magistralın Pakistan hissəsinin uzunluğu İranla sərhəddən Qvadar dəniz limanına qədər 800 km-dir.

Qadir, Bizimyol.info