Fransa prezidenti Emmanuel Makron və Polşanın baş naziri Donald Tusk martın 15-də Berlində Almaniya kansleri Olaf Şolz ilə Ukraynadakı vəziyyəti müzakirə edəcəklər.

Bizimyol.info xəbər verir ki, bu barədə “Politico” qəzeti mənbələrə istinadən məlumat yayıb.

Nəşrin qeyd etdiyi kimi, günorta saatlarında fransız və alman siyasətçiləri ikitərəfli görüş keçirəcək, daha sonra Polşanın baş naziri onlara qoşulacaq. "Politico" bildirir ki, bu, Tusk 2023-cü ilin dekabrında hökumətin başına keçdikdən sonra ilk Veymar Üçbucağı görüşü olacaq.

Nəşrin mənbəsinin sözlərinə görə, görüşün məqsədi mediada fikir ayrılıqlarının artması ilə bağlı yayılan xəbərlər fonunda Ukrayna məsələsi üzərində işləməkdə liderlərin birliyini nümayiş etdirməkdir.

Qəzet yazır ki, sənədlərin imzalanması və ya konkret müqavilələrin elan edilməsi nəzərdə tutulmur.

Martın 1-də "Bloomberg" mənbələrə istinadən xəbər verir ki, Fransa prezidenti Emmanuel Makron və Almaniya kansleri Olaf Şolz qarşılıqlı əlaqənin əvvəlindən bir-biri ilə yaxşı yola getməyiblər; Fransa lideri hesab edir ki, alman həmkarında cəsarət və ambisiya yoxdur. Onun sözlərinə görə, iki lider arasında fikir ayrılığı Ukraynadakı münaqişənin gedişinə “təsir edə bilər”.

Daha əvvəl “Financial Times” qeyd edib ki, Fransa və Almaniya arasında Kiyevə hərbi yardımla bağlı fikir ayrılıqlarından yaranan düşmənçilik Ukraynaya silah tədarükünü maliyyələşdirmək üçün Avropa İttifaqının (Aİ) fondunun yaradılmasına mane olur. “Politico” qəzeti isə öz növbəsində Makron və Şolz arasında Ukraynaya hərbi yardım göstərilməsi məsələsində fikir ayrılığının açıq münaqişəyə çevrilməyə başladığına işarə edib.

Veymar üçbucağı Almaniya, Fransa və Polşa arasında 1991-ci ilin avqustunda yaradılmış üçtərəfli formatdır. İlkin olaraq o, üç ölkə arasında əməkdaşlığı inkişaf etdirmək vəzifəsini qoydu və Polşanı Aİ və NATO ilə yaxınlaşdırmaq üçün bir vasitə kimi düşünüldü.

Qadir, Bizimyol.info