Əfqanıstan və Pakistan arasında yük maşını sürücüləri ilə bağlı viza mübahisəsi səbəbilə yanvarın 12-dən nəqliyyat vasitələrinə bağlı olan Torkham Sərhəd Qapısının açılması üçün danışıqlar davam edir.

Bizimyol.info xəbər verir ki, Əfqanıstan müvəqqəti hökumətinin sözçüsü Zabihullah Mücahid mövzu ilə bağlı açıqlama verib.

Mücahid iki ölkənin səlahiyyətliləri arasında sərhəd qapısının açılması ilə bağlı danışıqların davam etdiyini və detalların tezliklə ictimaiyyətlə açıqlanacağını bildirib.

Torkham Sərhəd Qapısı yanvarın 12-də nəqliyyat vasitələrinin keçidi ilə bağlı viza problemlərinə görə Pakistan tərəfindən bağlanıb, lakin piyadalar oradan keçməyə davam edir. Digər tərəfdən, sərhəd qapısının bağlanması əfqan tacirlərinin ticarətinə böyük ziyan vurur.

Pakistan və Əfqanıstanın sərhəd bölgəsindəki gərginlik bəzən silahlı qarşıdurmalara səbəb ola bilir. Bu səbəbdən Torkham Sərhəd Qapısı bəzən bir müddət bağlı qalır. İki ölkə arasında 2640 kilometrlik quru sərhədində 18 keçid məntəqəsi var. Torkham və Chaman sərhəd qapıları ən işlək sərhəd qapıları kimi seçilir.

Torkham Sərhəd Qapısı sonuncu dəfə 6 dekabr 2023-cü ildə bağlanıb.

Qadir, Bizimyol.info