Yaponiya, Böyük Britaniya və İtaliyanın müdafiə nazirləri Tokioda keçirilən danışıqlar zamanı gələcək nəsil qırıcıların hazırlanması layihəsinin həyata keçirilməsinə cavabdeh olacaq bir təşkilat yaratmaq barədə razılığa gəliblər.

Bizimyol.info xəbər verir ki, bu barədə Kyodo agentliyi məlumat yayıb.

Britaniyanın "BAE Systems", Yaponiyanın "Mitsubishi Heavy Industries" və İtaliyanın "Leonardo" şirkətlərinin rəhbərliyi yeni yaradılan müəssisəyə nəzarət edəcək. Onun öhdəliklərinə layihə daxilində tapşırıqların bölüşdürülməsi və digər funksiyalar daxildir. Təşkilatın baş qərargahı Böyük Britaniyada yerləşəcək, ona Yaponiya tərəfinin nümayəndəsi rəhbərlik edəcək və üç ölkənin hökumətləri özlərinin bir neçə yüz mütəxəssisini ora göndərəcəklər.

"Kyodo" agentliyinin verdiyi məlumata görə, Yaponiya hakimiyyəti bu strukturun əməliyyat xərclərini ödəmək üçün 2024-cü maliyyə ilində (2024-cü il aprelin 1-dən başlayaraq) təxminən 4 milyard yen (təxminən 28 milyon dollar) ayırmağı gözləyir.

2022-ci ilin dekabrında Böyük Britaniya, İtaliya və Yaponiya 2035-ci ilə qədər hazır olacaq yeni nəsil döyüş təyyarəsinin birgə hazırlanması barədə razılığa gəliblər. Müvafiq proqramlar - London və Roma tərəfindən həyata keçirilən "Tempest" və Yapon "F-X" - ümumi adı "GCAP" (Qlobal Döyüş Hava Proqramı) altında birləşdirilib. Layihə ABŞ və Aİ-nin inkişaflarına alternativ olacaq qırıcının yaradılmasına yönəlib. ABŞ və NATO hərbi texnikası ilə qarşılıqlı fəaliyyət onun mərkəzi konsepsiyası olacaq.

Layihədə “BAE Systems”, “Mitsubishi Heavy Industries” və “Leonardo”dan başqa üç ölkədən digər şirkətlər də iştirak edəcək. Belə ki, martın 15-də "Mitsubishi Electric Corporation", "Leonardo", onun Britaniyadakı törəmə şirkəti "Leonardo UK" və İtaliyanın "Elettronica" şirkətləri altıncı nəsil qırıcının hazırlanması sahəsində əməkdaşlıq müqaviləsi bağladılar.

Yaponiyada bu döyüş təyyarəsi köhnəlmiş "F2" qırıcılarını əvəz etməlidir. Tokio ilk dəfədir ki, ABŞ-dan başqa bir ölkə ilə birgə silah hazırlayır.

Qadir, Bizimyol.info