Məsələ ilə bağlı Azad İstehlakçılar Birliyinin sədri, qida eksperti Eyyub Hüseynov Bizimyol.info xəbər portalına bildirib ki, bu, olduqca əcaib bir haldır və mütləq araşdırılmalıdır. Qida sahəsində hökumət bürokratik yoxlamanı ləğv etməli və cəld reaksiya mexanizmi, cəld yoxlamalar bərpa olunmalıdır.
Eyyub Hüseynov"İstənilən dəyirmanda siçanlar yuva salır. lakin həmin dəyirman sahibləri, biznes sahibləri elə bir şərait yaratmalıdırlar ki, həmin gəmiricilər ərzaq mallarına yaxın gəlməsinlər. Ancaq görünür, bu şəraiti yarada bilməyiblər. Əgər unun içindən gəmirici çıxırsa, deməli, orada heç bir sanitar vəziyyətdən danışmaq olmaz. Bu, artıq çox təhlükəlidir və gərək buna görə əhali adıçəkilən firma məhsulunu boykot etsinlər. Görünür, həmin gəmiricilər məhsul üyüdülməmişdən öncə kisəyə daxil oldublar. Belə başa düşmək olar. Çünki üyüdülmə prosesində onlar iştirak edə bilməzlər. Bu, yolverilməzdir.
Onu da qeyd edim ki, ümumiyyətlə, Qida Təhlükəsizliyi Agentliyi (AQTA) qida sahəsini tam əhatə edə bilmir. Agentlik cəld yoxlamalar apara bilmir, buna icazə yoxdur. Hökumətin səhv siyasəti, yəni qida yoxlamalarının qadağan olunması və qurumların cəld reaksiya mexanizminin olmaması belə vəziyyətin çoxalmasına gətirib çıxardacaq. Baxmayaraq ki, AQTA 3 ildir fəaliyyət göstərir, onların əlindən bu imkan gəlir ki, qida zəncirində iştirak edənləri reyestrə daxil etsinlər və planlı yoxlamalar aparsınlar. Planlı yoxlamalar zamanı da öncədən xəbər verilir və bu, uzun, bürokratik bir prosedurdur. Qarşı tərəf də bilir ki, yoxlama gəlir və nələri yoxlayırlar və sair. Hökumət qida sahəsində tətbiq olunan bu cür bürokratik yoxlamanı ləğv etməlidir və cəld reaksiya mexanizmi, cəld yoxlamalar bərpa olunmalıdır. Çox təəssüf ki, bu formada yoxlama hazırda tətbiq olunmur. Əlbəttə, AQTA-nın bu şəkildə "əli-qolu bağlı" vəziyyətdə və Azad İstehlakçılar Birliyinin bir ictimai təşkilat olaraq son dərəcə yetərsiz işləməsi gətirib o yerə çıxarıb ki, artıq un məhsullarının içindən gəmiricilər çıxır. Qeyd olunan belə bir fakt varsa, AQTA bu yöndə ciddi yoxlamalar aparmalıdır" - deyə, qida eksperti qeyd edib.
Məlumat üçün qeyd edək ki, Qida Təhlükəsizliyi Agentliyi məsələnin nəzarətə götürüldüyünü və araşdırılacağını bildirib.
P.S. Adıçəkilən qurumun bu istiqamətdəki açıqlamasını da işıqlandırmağa hazırıq.
Mətin Şükürlü, Bizimyol.info
