Dəniz suyunun içməli su kimi istifadəsi uzun müddətdir müzakirə olunsa da, Türkiyədə bir adada dəniz suyundan içməli su kimi istifadə edilir. Və bu uzun müddətdir ki, belədir.

Bizimyol.info xəbər verir ki, bu barədə Türkiyə mətbuatı məlumat verib. Balıkəsirdə Mərmərə rayonunda yerləşən bu ada bir çox turistlərin üz tutduğu yerlərdən biridir. Bununla belə, bu ada istirahət məkanı olmaqla yanaşı, onu digər adalardan fərqləndirən bir xüsusiyyətə malikdir.

Avşa adasında 2010-cu ilə qədər içməli su böyük problem idi. Yeraltı sərvətlərin sürətlə tükənməsi və içməli suyun qeyri-kafi olması səbəbindən Balıkəsir Bələdiyyəsi 2010-cu ildə 10 milyon 568 min TL investisiya ilə adada su təmizləyici qurğu qurub. Bu təmizləyici qurğu sayəsində dəniz suyu təmizlənərək içməli su əldə edilir.

Təmizlənmiş dəniz suyu təkcə evlərdən deyil, həm də otel kranlarından axır.

Dəniz suyunun təmizlənməsi və içməli halına gətirilməsi ilə bağlı müzakirələr davam edir, lakin Balıkəsir Bələdiyyəsi 10 ildir ki, bu üsulu tətbiq edib. Adanın əhalisi təxminən 4 min ikən, tətil mövsümündə 120 minə qədər yüksəlir. Belə olan halda içməli su ilə təmin etmək çox çətinləşir. Buna görə də Balıkesir Bələdiyyəsi təmizləyici qurğu qurub və ada sakinləri dəniz suyundan içməli su kimi istifadə edə bildilər. Bu qurğu Mərmərə dənizinin suyundan hər gün təxminən 4 min kubmetr içməli su istehsal edir. Üstəlik, bu suyun tərkibindəki əhəng digər şəbəkə sularından azdır. Camaatın bundan razı qaldığını görən Balıkəsir Bələdiyyəsi tutumunu daha 2 min kubmetr artırmağı planlaşdırır.

Mərmərə Adaları Bələdiyyə Başçısı Süleyman Aksoy obyektin daha çox xalqın tələbi ilə açıldığını bildirir. Təbii ki, bunda turizm sektorunun da böyük payı var.

Ən maraqlı məsələ dəniz suyunun necə təmizləndiyidir.

Sahildən 465 metr məsafədə 15 metr dərinlikdən götürülən dəniz suyu qurğuya ötürülür və təmizləyici qurğunun çənlərində saxlanılır. Daha sonra əvvəlcə çiy su qaba və incə süzgəclərdən keçirilir və qaba kir təmizlənir. Çənlərdən götürülən dəniz suyu əvvəlcə 10 mm-lik ələklərdən, sonra digər 1 mm-lik ələklərdən keçir və qum filtrinə verilir.

Daxil olan su, mineralları suda saxlamaq üçün tərs osmos üsulu ilə 50% emal edilir. Daha sonra su dolomit filtrlərindən keçirilir və remineralizasiya prosesinə məruz qalır. Son mərhələdə xlorlama prosesi aparılır və şəbəkə suyuna ötürülür.

Lakin bu təmizləmə prosesindən əldə edilən suyun 50%-i dənizə qayıdır. Mərmərə Adaları Bələdiyyə sədrinin müavini Erhan Uzuner dənizdən alınan suyun ümumilikdə dörd mərhələdən keçdiyini, müxtəlif mineralların orada qaldığını və hasil edilən suyun yarısının yenidən dənizə qaytarıldığını bildirib. Bununla belə, bu təmizləmə prosesinin dəyəri kifayət qədər yüksəkdir. Bir çox təmizləyici qurğular yüksək xərclər səbəbindən dəniz suyunu içməli suya çevirə bilmir. Lakin təmizləmə texnologiyalarının inkişafı ilə bu xərc gələcəkdə azala bilər.

Qadir, Bizimyol.info