Nüvə silahları Koreya Xalq Demokratik Respublikasının (KXDR) təhlükəsizliyinə təminat verə bilməz, çünki onların Seula qarşı istifadəsi Koreya Respublikası və ABŞ qüvvələrinin reaksiyası nəticəsində “rejimin sonu” ilə nəticələnəcək.

Bizimyol.info xəbər verir ki, bunu Koreya Respublikası Silahlı Qüvvələrinin yaradılmasının 75-ci ildönümü münasibətilə keçirilən mərasimdə çıxış edən Cənubi Koreya prezidenti Yun Seok Yeol deyib.

"Şimali Koreya rejiminə aydın olmalıdır ki, nüvə silahı heç vaxt onun təhlükəsizliyinə zəmanət verə bilməz. Döyüş hazırlığına və imkanlarına əsaslanaraq, ordumuz Şimali Koreyanın istənilən təxribatına dərhal cavab verəcək. Şimali Koreya nüvə silahından istifadə edərsə, Cənubi Koreya-ABŞ müttəfiqliyinin cavabı onun rejiminin sona çatmasına səbəb olacaq. Şimalın nüvə hədələri artıq heç kimi qorxutmur, əksinə, daha da səfərbər edir", - deyə prezident Seongnamdakı aviabazada çıxışı zamanı bildirib.

Koreya Respublikası Silahlı Qüvvələrinin yaranma günü oktyabrın 1-nə təsadüf edir, lakin sentyabrın 26-da Seulda 10 ildən sonra ilk dəfə parad keçiriləcək.

Yoon Seok Yeol həmçinin ABŞ və Yaponiya ilə əməkdaşlığı artırmağa davam edəcəyini bildirib. "Bundan əlavə, xalqımız Şimali Koreya kommunist rejiminin, onun ardıcıllarının və anti-dövlət qüvvələrinin yalan hiylələrinə, eləcə də yalançı sülh vədlərinə heç vaxt aldanmayacaq", - deyə Prezident əlavə edib.

Cənubi Koreya lideri hökumətin hərbi sənaye sektorunu dəstəkləmək niyyətində olduğuna da işarə edib.

Qadir, Bizimyol.info