Müxtəlif rəqəmlər deyilir: min, iki min, üç min. Bəlkə çoxdu, ya azdı. Bilmirəm. Əsas odur ki, gəlib Qarabağda - özününkü olmayan torpaqda məskunlaşan erməniəsilli adamlar çıxıb gedir.
Terrorçular mülki geyimdə aradan çıxır. Öz qocalarını bizim hərbçimizin çiyinlərinə buraxıb qaçırlar. Hətta azad olunan kəndlərə Azərbaycan ordusu daxil olarkən, qadın paltarı geyib qadınların arasında gizlənməyə çalışan terrorçular da olub.
O qədər çox və çox ağır cinayətlər törədiblər ki, indi gizlənməyə də yer tapa bilmirlər. Azərbaycan hüquq-mühafizə orqanlarının müstəntiqlərinin suallarına cavabları yoxdur. Artıq proses başlayıb və davam edir. Budur, Dövlət Təhlükəsizlik Xidməti Əhmədbəyli-Füzuli-Şuşa yolunda terror törədərək 4 nəfər azərbaycanlı polisin və 2 nəfər mülki işçinin həyatına son qoyan caniləri saxlayıb. Bu, davam edəcək. Çünki canilər də cinayət törətməkdə davam edirlər; Xankəndində inzibati binaları, Ağdərədə azərbaycanlılara məxsus olmuş evləri kütləvi şəkildə yandırırlar. Bununla bağlı Azərbaycanın təhlükəsizlik orqanı müraciət edib, belə əməllərdən çəkinməyə çağırıb. Bu, əslində xəbərdarlıqdır. Çünki cinayət törədənlərin cavab vermə anı da gəlib çatacaq. Kim qanunlara tabe olmaq istəməsə, qanunlar onunla sərt davranacaq.
Bizimlə, azərbaycanlılarla birlikdə yaşamaq istəməyənlər çıxıb gedir və getsin də. Çünki Azərbaycan Türkü ilə - belə mərhəmətli xalqla birlikdə yaşamağa layiq olmayanlar elə getsə yaxşıdır.
Biz sülhsevər xalqıq. Qaniçən xislətlilərin bizimlə eyni torpaqda nə işi var?! 50-100 il sonra fürsət düşən kimi yenə də eyni əməlləri törətməyəcəkləri nə məlum?! Amma dinc, normal, insan, vətəndaş kimi qalıb yaşamaq istəyənə də kimsə bir söz demir.
Hərçənd, mənim fikrimcə, baş verənlərə görə o mülki dediyimiz əhali də mənəvi məsuliyyət daşıyır. Bir neçə həftə, hətta bir neçə gün əvvələ qədər küçələrə tökülüşüb: "Biz türklərlə birlikdə yaşamaq istəmirik" deyən, özünə gələn humanitar yardımın belə yolunu kəsən onlar deyildimi?! "Biz türk çörəyi yemirik" deyib, indi Azərbaycanın yardım maşınlarının ətrafında basabas salanlar onlar deyilmi?! Öz millətinin, öz millətindən olan dövlətin - Ermənistanın işğalçılıq, qarətçilik, terrorçuluq, kütləvi qətliam, soyqırım, etnik təmizləmə kimi insanlığa qarşı ən ağır cinayətlərinə göz yuman, susqun razılıq verən, hətta aşkar dəstəkləyən adamlar bunlar deyildimi?!
Ancaq, görürsünüz, birlikdə və dinc yaşamaq ümidilə biz bütün bunların üstündən keçirik. Bir sutkada bu qədər əsgər və zabitimizi şəhid edənlərə yenə: "Silahı yerə qoyun, bağışlayarıq" deyirik. Yamanlığa yaxşılıqla cavab veririk. Bundan sonra da yaxşılığımıza yamanlıqla cavab verəcəklərsə, bizim torpağımızda yaşamaq haqqını tamamilə itirəcəklər. Əgər insanlıqlarını bu qədər itiriblərsə...
P.S. Azərbaycan dövlətinin və ümumiyyətlə, insanlığın qanunlarından qaçıb gizlənməyə yer axtaranlar, İlahi Ədalətdən harda gizlənəcəksiniz?!
Bahəddin Həzi, Bizimyol.info