Yəqin ki, hamınız Beyləqanda “Zəncirli pir” haqqında eşitmisiniz. "Cərcis Peyğəmbər" ziyarətgahı kimi də tanınan pir, Beyləqanın Şəfəq qəsəbəsində yerləşir. Beyləqana gəlib, çoxunun tanıdığı və inandığı pirə gəlməmək olmazdı. Odur ki, biz də pirə baş çəkdik.
Pirin ortasında məzarın yaxınlığında tavandan bir zəncir asılıb, ürəyində əhsi olanlar həmin zəncirə yaylıq atırlar. Nə kəramətdirsə, zəncir ona atılan bəzi yaylıqları özündə saxlayır, bəzilərini isə yerə atır. Deyilənə görə, qəbul edilən yaylıqlar həyata keçəcək arzuların xəbərçisidir. Kimin ki, yaylığını zəncir qəbul etmir, deməli arzusu həyata keçməyəcək. Bir qədər mövhumata bənzəsə də, buna inananların sayı kifayət qədərdir.
Pirin maraqlı tarixi var. İslami mənbələrdə Cərcis peyğəmbər kimi təqdim edilir. Bəzi mənbələrə görə, Cərcis - müqəddəs Georgi, Mosulda büdpərəst padşaha qarşı çıxdığı üçün öldürülür. Sonradan bu hekayə Azərbaycana da gəlib çıxır və Beyləqanda ona ziyarətgah inşa edilir. İnşa edilən ziyarətgah dağılsa da, XVII əsrdə yenidən inşa edilir və insanların inanc mənbəyinə çevrilir.
Qeyd edək ki, ziyarətgah tarixi abidə kimi Azərbaycan Mədəniyyət və Turizm Nazirliyinin, dini abidə olaraq Qafqaz Müsəlmanları İdarəsinin, icma olaraq Dini Qurumlarla İş üzrə Dövlət Komitəsinin tabeçiliyindədir.
Ziyarətgahın axundu Hacı Vidadi Mürsəlov əməkdaşımıza pirin tarixi haqqında danışır. O, qeyd edib ki, bəzən sosial şəbəkələrdə hər şey olduğu kimi təbliğ edilmir. İnsanların inancına toxunmaq, onları təhqir etmək olmaz.
Beyləqanda “Zəncirli pir” dən hazırladığımız video reportajı Bizimyol.info xəbər portalının rəsmi YouTube kanalında izləyə bilərsiniz.
İradə Cəlil, bizimyol.info