"Kommunikasiyaların, xüsusən də dəmir yolu xətlərinin bloklanmadan çıxarılması Ermənistan üçün yalnız Meqridən deyil, bütün marşrutlar açıldığı halda faydalı olacaq".
Bizimyol.info xəbər verir ki, bunu Ermənistan mətbuatına müsahibəsində "Cənubi Qafqaz Dəmir Yolu Veteranlar Şurası"nın sədri Levon Akopyan deyib.
“Əgər Meğridən keçən yol ilə yanaşı, İcevandan Qazaxa, Gümrüdən Qarsa, Arazdəyəndən (Yerasx) Naxçıvana gedən yollar açılsa, o zaman iqtisadi əlaqələrimiz möhkəmlənər. Əgər Azərbaycanla Naxçıvan arasında Meğridən keçən yolun cəmi 44 km-i açılsa, bu, Ermənistana heç nə verməyəcək”, - deyə o bildirib.
"Ona görə də kommunikasiyaların açılması ilə bağlı müqavilələrdə, əgər varsa, bütün bu dəmir yolu qovşaqlarının açılışını mərhələlərlə deyil, birlikdə qeyd etmək lazımdır", - deyə Akopyan əlavə edib.
Yolların açılması Türkiyə üçün də faydalı ola bilər, çünki o, Azərbaycanla ən qısa əlaqəni Gümrü və Vanadzor, daha sonra isə Dilican vasitəsilə əldə edəcək. Təbii ki, Mehridən keçən dəhliz də fayda verir. Ermənistan üçün İcevan-Qazax yolu Rusiyaya ən qısa yol kimi sərfəlidir. Mehridən Azərbaycandan keçən yol daha uzundur, lakin onun düz relyefi böyük qatarların onun üzərindən daha yüksək sürətlə keçməsinə imkan verir", - deyə o əlavə edib.
Türkiyə və Azərbaycanla dəmir yolu qovşaqlarının bərpasına nə qədər vaxt lazım olacaq sualına Akopyan cavab verib ki, kifayət qədər maliyyə ayrılsa, il yarıma onların hamısını bərpa etmək olar.
"İşin böyük hissəsi Azərbaycana gedən yolun bir hissəsinin sürüşmə zonasında olduğu İcevan istiqamətində aparılacaq. Bəzi ərazilərdə torpaq sürüşmələri yenidən çəkilməli olan dəmir yolu relsini dağıdıb. Arazdəyən tərəfdən Naxçıvanla sərhədə qovşağı bir neçə aya, eləcə də Gümrüdən Axuryana (Türkiyə ilə sərhəd) qədər bərpa etmək olar. Qars tərəfdən bu hissə daha uzun müddət yenidən qurulmalı olacaq, çünki məndə olan məlumata görə, Türkiyə uzun müddətdir təmir etməyib", - deyə Akopyan əlavə edib.
Qadir, Bizimyol.info
P.S: Göründüyü kimi, bir vaxtlar "Azərbaycanla hər hansı danışığa getməyəcək"ləri ədası ilə danışan ermənilər, artıq dəmir yollarının açılmasını deyil, hansı yolların açılmasını, guya müzakirə edirlər. Çünki Azərbaycan-Türkiyə dəmir yolu xəttinin açılması ermənilər üçün müzakirə mövzusu olmaqdan çıxıb.
