“Ermənilər bu və ya digər namizədin qalib gələcəyi təqdirdə Türkiyənin Ermənistanla bağlı siyasətinin dəyişib-dəyişməyəcəyi ilə maraqlanmamalıdır”.

Bizimyol.info xəbər verir ki, bunu Sputnik Ermənistan -a müsahibəsində türkoloq Ruben Melkonyan qonşu Türkiyədə keçiriləcək seçkilərdən erməni cəmiyyətinin gözləntilərini şərh edərkən deyib.

Melkonyanın fikrincə, Ermənistanın əvvəllər müdafiə etdiyi mexanizmlərə sadiq qalmalı, erməni millətinin şərəfini qorumağı bacarmalı və tarixi yaddaşından əl çəkməməlidir.

"Seçkilərdən sonra Türkiyənin Ermənistanla bağlı siyasəti dəyişməyəcək. Türkiyənin bütün qətnamələrində - dövlət, iqtisadi, təhlükəsizliklə bağlı - Ermənistan düşmən ölkə kimi qəbul edilir. Türkiyə cəmiyyəti üçün Ermənistan ilk üç düşmən ölkədən biridir və ona görə də hakimiyyətin başında duran şəxs dəyişərsə, dövlətin yanaşması fərqli olacaq fikirlərindən əl çəkmək lazımdır.

İstər Ərdoğan, istər Kılıçdaroğlu, istərsə də başqası olsun, mühüm sahələr dəyişməz qalacaq”, -deyə o, bildirib.

Melkonyan onu da əlavə edib ki, türk ideologiyasında “erməni” ifadəsi lənət kimi qəbul edilir.

“Türkiyənin keçmiş və indiki prezidentləri erməni adlandırılarkən məhkəməyə müraciət edərək namuslarına vurulan zərərin ödənilməsini tələb ediblər.

Ölkəmizin lideri türk adlandırılmasından incimirsə, Türkiyə prezidenti erməniləri tarixi düşmən hesab etdiyi üçün onun erməni sayılmasından inciyib”,- deyə Melkonyan vurğulayıb.

Xatırladaq ki, mayın 28-də Türkiyədə prezident seçkilərinin ikinci turu keçiriləcək. İlk turda Türkiyənin hazırkı prezidenti Rəcəb Tayyib Ərdoğan 49,51 faiz, müxalifətdəki Xalq Blokunun namizədi Kamal Kılıçdaroğlu 44,88 faiz, Sinan Oğan 5,17 faiz səs toplayıb.

Leyla Mirzə