"İkinci səfərbərlik dalğasının keçirilməsi Rusiya Federasiyası Silahlı Qüvvələri Baş Qərargahının planlarında deyil, çünki tapşırıqları yerinə yetirmək üçün kifayət qədər könüllülər və həqiqi hərbi xidmətə çağırılmış vətəndaşlar var".

Bizimyol.info xəbər verir ki, bunu Rusiya Federasiyası Silahlı Qüvvələri Baş Qərargahının Baş Təşkilat və Səfərbərlik İdarəsinin rəisi, kontr-admiral Vladimir Tsimlyanski deyib.

“Hamınızı əmin etmək istəyirəm ki, Baş Qərargahın planlarına ikinci səfərbərlik dalğası daxil deyil. Artıq hərbi xidmətə çağırılmış şəxslər, eləcə də könüllü şəkildə müharibədə iştirak etmək arzusunu bildirmiş vətəndaşlar qarşıya qoyulan tapşırıqları yerinə yetirmək üçün kifayət qədərdir. Bundan sonra xüsusi səfərbərliyin olması güman edilmir", - deyə o, yaz layihəsi ilə bağlı brifinq zamanı bildirib.

Tsimlyanski həmçinin qeyd edib ki, Rusiya Federasiyasının Müdafiə Nazirliyi müqavilə üzrə xidmət seçim məntəqələri şəbəkəsini genişləndirib, çünki hazırda müqavilə əsasında könüllü hərbi xidmətə girməyə qərar verən vətəndaşların sayı da xeyli artıb. Onun sözlərinə görə, eyni zamanda, bununla əlaqədar namizədlərlə iş üzrə təlimatçıların sayı da artırılıb. O qeyd edib ki, müqavilə ilə işə qəbul üzrə işlər subyektlərin dövlət orqanları ilə sıx əməkdaşlıq şəraitində davam etdirilir.

Bu il yaz hərbi xidmətə çağırışı adi vaxtda - aprelin 1-dən iyulun 15-dək keçiriləcək və 18-27 yaşlı 147 min Rusiya vətəndaşını əhatə edəcək. Eyni zamanda, ilk dəfə olaraq qulluğa qəbul olunanların, o cümlədən elektron formada məlumatlandırılması nəzərdə tutulur.

Qadir, Bizimyol.info