On minlərlə israilli şənbə günü axşam saatlarında İsrail küçələrinə çıxıb, Benyamin Netanyahu hökumətinin siyasətinə və onun ölkənin məhkəmə sistemində planlaşdırdığı islahatlara etirazlarını bildiriblər.

Bizimyol.info xəbər verir ki, İsrail mətbuatının verdiyi məlumata görə, ən böyük mitinq, əvvəlki həftələrdə olduğu kimi, müxalifətin xüsusilə güclü olduğu Təl-Əvivdə keçirilib.

Nümayişçilər baraban və məşəllərlə şəhərin mərkəzindəki Dizengoff meydanından demokratiya tərəfdarı şüarlar səsləndirərək yürüş edib və şəhərin şərqindəki hökumət kompleksinin qarşısındakı digər etirazçılar qrupuna qoşulublar. Ənənəvi olaraq orada böyük mitinq keçirilib.

Çıxış edənlər Netanyahu hökumətinin siyasətini sərt tənqid edib, müxalifətin fikrincə, məhkəmə islahatlarına səbəb ola biləcək hakimiyyətin qəsb edilməsinin yolverilməzliyindən danışıblar. Etirazçılar əllərində çoxlu İsrail bayraqları ilə gəliblər və şüarlar səsləndiriblər: “Demokratiya” və “İsrail diktatura deyil”.

İsraildə 11-ci həftədir ki, şənbə günü kütləvi müxalifət etirazları keçirilir. Təl-Əvivdəki ən böyük mitinqlə yanaşı, Qüds, Hayfa, Beerşeba, Netanya da daxil olmaqla, ölkənin bir çox başqa şəhərlərində də nümayişlər keçirilib. Təşkilatçıların sözlərinə görə, həmin axşam mitinqlər ölkənin 120 müxtəlif yerində baş tutub.

İsrail telekanalı 13-ün məlumatına görə, Təl-Əviv mitinqində 175 minə yaxın adam iştirak edib və ümumilikdə ölkə boyu 260 minə yaxın nümayişçi küçələrə çıxıb.

Ötən ilin sonunda and içən Netanyahunun kabinetinə qarşı müxalifətin kütləvi etirazları yanvarın əvvəlindən davam edir. Etirazlara səbəb yeni hökumətin təklif etdiyi, xüsusən də Ali Məhkəmənin səlahiyyətlərinin məhdudlaşdırılmasını və hakimlərin seçiminə nəzarətin kabinetə verilməsini nəzərdə tutan məhkəmə islahatları layihəsi olub.

Müxalifətin fikrincə, bu islahat dövlətin demokratik əsaslarını sarsıdır. Netanyahu israr edir ki, onun hökuməti demokratik seçkilərdən sonra formalaşıb və müxalifətin qarşıdurma ritorikasına baxmayaraq, seçicilərin əksəriyyətinin səs verdiyi proqramı həyata keçirəcək.

Çərşənbə günü axşam İsrail prezidenti Yitzhak Hersoq məhkəmə islahatları ilə bağlı etirazlarla əlaqədar həmvətənlərinə müraciət edib. O, televiziyadakı çıxışında ölkənin kəskin vətəndaş qarşıdurması astanasında olduğunu bəyan edib və bütün tərəfləri dialoqa çağırıb. Bu məqsədlə prezident məhkəmə islahatları ilə bağlı öz planını irəli sürüb, onun fikrincə, bu, bütün tərəflərin fikirlərini nəzərə alan kompromis variantdır. Netanyahu və hakim koalisiya liderləri təklifi rədd edərək, bunun hökumət qolları arasında istənilən balansı əldə etməyəcəyini bildiriblər.

Qadir, Bizimyol.info