Hakim "Gürcü Arzusu - Demokratik Gürcüstan" partiyası etirazlar fonunda xarici agentlərlə bağlı qanun layihəsini parlamentdən geri götürmək qərarına gəlib.

Bizimyol.info xəbər verir ki, bu barədə siyasi birliyin cümə axşamı dərc olunmuş bəyanatında deyilir.

“Cəmiyyətin hər bir üzvünə cavabdeh olan hakim qüvvə olaraq, dəstəklədiyimiz qanun layihəsini (xarici agentlər haqqında) heç bir şərt qoymadan geri götürmək qərarına gəldik", - bu barədə partiyanın saytı məlumat yayıb.

Partiya əlavə edib ki, onlar xarici agentlər haqqında qanunun qəbulunun nə üçün lazım olduğunu ictimaiyyətə daha yaxşı izah etməyi planlaşdırırlar. "Bunun üçün bütün ölkə ərazisində əhali ilə görüşlər keçiriləcək. Gürcüstan sülh və sabitliyi qoruyacaq və cəmiyyətin əsas seçimi olan Avropaya doğru ləyaqətlə irəliləyəcək", - partiya məlumatında qeyd edib.

Xarici agentlər haqqında qanun layihəsi çərşənbə axşamı Gürcüstan parlamenti tərəfindən birinci oxunuşda təsdiqlənib. Bu, müxalifətin, vətəndaş fəallarının, eləcə də sadə vətəndaşların ciddi narazılığına səbəb olub.

Martın 7 və 8-də Tbilisidə minlərlə etirazçı küçələrə çıxaraq etiraz aksiyası keçirilib. Hər iki mitinq gecə saatlarında sona çatıb, təhlükəsizlik qüvvələri təzyiqli su və gözyaşardıcı qazdan istifadə edərək etirazçıları dağıdıb. İki gün ərzində davam edən etiraz aksiyalarında 130-dan çox adam saxlanılıb, 60 polis yaralanıb.

Fevral ayında Gürcüstan parlamentində xarici agentlər haqqında qanun layihəsinin iki variantı qeydə alınıb - gürcü variantı və xarici agentlərin qeydiyyatı haqqında Amerika qanununun tərcüməsi olan Amerika variantı. Gürcüstan versiyasına görə, media da xarici agent ola bilər, halbuki təşəbbüs ayrı-ayrı şəxslərə şamil edilmir. Amerika versiyası təkcə hüquqi şəxslərə deyil, həm də fiziki şəxslərə şamil edilir, bura cinayət məsuliyyəti də daxildir. Gürcüstan parlamenti artıq gürcü dilindəki variantı ekspertiza üçün Venesiya Komissiyasına göndərib.

Qadir, Bizimyol.info