“Tehranın Ermənistanla əlaqələr qurmaq cəhdləri Bakıda Azərbaycanın müharibədə qələbənin bütün bəhrələrini almasına əngəl kimi qiymətləndirilir”.

Bizimyol.info xəbər verir ki, bu sözləri rusiyalı beynəlxalq politoloq Sergey Markedonov Bunin & Co teleqram kanalında yazıb.

Onun sözlərinə görə, Azərbaycan-İran münasibətləri son vaxtlar kəskin şəkildə pisləşib. Lakin iki qonşu dövlətin baxışları nə qədər fərqli olsa da, onları bir şey birləşdirir. Həm Tehran, həm də Bakı qəti şəkildə üçüncü ölkələrin maraqları naminə heç kimlə döyüşmək istəmir.

Markedonov açıqlamasında xatırladıb ki, yanvarın 27-də Azərbaycanın Tehrandakı səfirliyinə hücum olub və həmin obyektin təhlükəsizliyini təmin edən Azərbaycan xüsusi xidmət orqanlarının əməkdaşı Orxan Əsgərov həlak olub.

Bu cür hadisələrin hər zaman ikitərəfli münasibətlər üçün bir sınaq olduğunu qeyd edən məqalə müəllifi İran paytaxtında baş verən faciəli hadisədən sonra böhrandan çıxmaq üçün cəhdlər edildiyini diqqətə çatdırıb.

Politoloq əlavə edib ki, o cümlədən, yanvarın 29-da prezidentlər İlham Əliyevlə İbrahim Rəisi arasında telefon danışığı olub. İran tərəfi Azərbaycan tərəfinə başsağlığı verib, Əliyev isə terror aktını kəskin pisləyərək, araşdırmanın tez və şəffaf aparılmasının vacibliyini bildirib.

Politoloqun sözlərinə görə, böhrandan çıxmaq üçün optimal alqoritm tapılıb. Lakin iki prezidentin söhbətindən cəmi bir neçə gün sonra Azərbaycan Xarici İşlər Nazirliyi bəyan edib ki, İslam Respublikası “terror aktının beynəlxalq səviyyədə beynəlxalq təşkilatlarda geniş şəkildə ifşasının” qarşısını alır: “Bundan əlavə, rəsmi Bakı öz vətəndaşlarına İrana səfər etməyi tövsiyə etməyib. Eyni zamanda, respublikanın Daxili İşlər Nazirliyinin “İran casus şəbəkəsi”nə qarşı keçirdiyi xüsusi əməliyyat Azərbaycan mətbuatında və sosial mediada geniş müzakirə olunub”.

Etno-siyasi proseslər üzrə mütəxəssis qeyd edir ki, İran ABŞ və İsrailin yüksək səviyyəli siyasətçilərinin bir sıra bəyanatları fonunda pilotsuz təyyarələrlə hücuma məruz qalıb və bu, vəziyyəti daha da gərginləşdirib.

Bundan əlavə, o, qeyd edib ki, ikinci Qarabağ müharibəsi Tehranı bu istiqamətə diqqəti artırmağa məcbur edib. 2020-ci ilə qədər isə İslam Respublikası diqqətini Yaxın Şərqə yönəldib və Qafqaz regionu ilə “qalıq prinsipi” ilə məşğul olub.

Sonda politoloq bildirib ki, İran və Azərbaycanın da ümumi iqtisadi maraqları var və hərbi-siyasi eskalasiyanın onlara zərbə vuracağını başa düşmək o qədər də çətin deyil. O, əmindir ki, hadisələrin mənfi ssenari üzrə inkişafı üçün heç bir çətin ilkin şərtlər yoxdur.

Leyla Mirzə