Çin hökuməti zəlzələnin nəticələri və xilasetmə işləri üçün Türkiyəyə 40 milyon yuan (təxminən 5,9 milyon dollar) məbləğində təcili humanitar yardım ayıracaq.

Bizimyol.info xəbər verir ki, bu barədə çərşənbə axşamı Çin Mərkəzi Televiziyası məlumat yayıb.

Materialda qeyd edilir ki, Çin hakimiyyəti təcili humanitar yardımın göstərilməsi mexanizmini dərhal işə salıb və Suriya və Türkiyəyə təcili humanitar yardım göstərmək qərarına gəlib.

Qeyd edildiyi kimi, təcili yardımın ilk partiyası Türkiyəyə 40 milyon yuan (indiki məzənnə ilə təxminən 5,9 milyon dollar) məbləğində ayrılacaq. Bu, zərər çəkmiş ərazilərə xilasetmə və tibbi qrupların göndərilməsini, eləcə də zərərçəkənlərə kömək üçün maddi resursların təmin edilməsini əhatə edəcək.

Hesabatda Çin Qızıl Xaç Cəmiyyətinin də Suriya və Türkiyəyə müvafiq olaraq 200 min dollar ayıracağı qeyd edilib.

Bazar ertəsi Dövlət Şurasının Beynəlxalq İnkişaf və Əməkdaşlıq üzrə Dövlət İdarəsi bildirib ki, Çin Suriya və Türkiyənin hakimiyyət orqanları ilə əlaqə saxlayır və onlara təcili humanitar yardım göstərməyə hazırdır.

Qeyd edək ki, Yeni Zelandiya da Türkiyə və Suriyada zəlzələdən zərər çəkənlərə humanitar yardım üçün 940 min dollar bağışlayıb.

Bu barədə çərşənbə axşamı ölkənin xarici işlər naziri Nanaia Mahuta müvafiq bəyanatla çıxış edib: “Biz qurbanları qida, çadır, yorğan kimi əsas ehtiyaclarla təmin etmək, həmçinin lazımi tibbi və psixoloji dəstək göstərmək üçün Türkiyə və Suriyadakı Beynəlxalq Qızıl Xaç və Qızıl Aypara Cəmiyyətləri Federasiyasına 1,5 milyon NZ$ (təxminən 940,000 dollar) məbləğində ilk ödəniş göndərdik", - Mahuta ölkə hökumətinin saytında dərc olunan bəyanatda bildirib.

Nazir qeyd edib ki, Yeni Zelandiya gələcəkdə zəlzələdən zərər çəkənlərə vaxtında yardım göstərmək üçün vəziyyətə nəzarəti davam etdirəcək. Gözlənildiyi kimi, sözügedən yardım çərçivəsində 1 milyon Yeni Zelandiya dolları (təxminən 627 min dollar) Türkiyəyə, qalanı isə Suriyaya göndərilib.

Qadir, Bizimyol.info