Bir neçə gün öncə Türkiyədə təhlükəsizlik ilə əlaqədar bəzi ölkələr diplomatik və konsulluq nümayəndəliklərini müvəqqəti bağlayıb.

Bura ABŞ, Hollandiya, İsveçrə, İsveç, İngiltərə, Almaniya, Belçika, Fransa və İtaliya daxildir. Bu ölkələrin nümayəndəlikləri  Xarici İşlər Nazirliyinə çağırılıb və onlara Ankaranın mövqeyi izah edilib.

Türkiyə Daxili İşlər naziri Süleyman Soylu isə səfirliklərin bu addımını psixoloji müharibə adlandırıb. Türkiyənin Qafqaz Araşdırmaları Mərkəzinin rəhbəri, siyasi analitik Hasan Oktay bizimyol.info xəbər portalına açıqlamasında bildirib ki,  Türkiyə seçkidən əvvəl çox ciddi bir dövrünü yaşayır. Rəcəb Tayib Ərdoğan yenidən seçilmək, müxalifət isə Ərdoğanı iqtidardan  göndərmək üçün  böyük bir mübarizəyə girişib.

Hasan Oktay

Politoloqun fikrincə, bu mübarizə bütün dünyanın diqqətini öz üzərinə çəkib.

“İsveçdə Quranın yandırılması hadisəsi  Türkiyədə daxili siyasətdə vasitəyə çevrildi.   Hökümət rəsmiləri  mütəmadi olaraq İsveçə əlaqəli  olan bu hadisə ilə bağlı etirazlarını bildirirdilər.

Bu etirazlar   zaman-zaman  təhdid hərəkətlərinə çevrilməyə başladı.  Daha sonra İŞİD-in  yaxın zamanlarda  hərəkətə keçəcəyi ilə bağlı xəbərlər gündəmdə yer aldı”-deyən politoloq qeyd edib ki, bəzi ölkələr  İstanbulda 11 noyabrda törədilən canlı bomba hadisəsi kimi bir partlayış  və ya birbaşa  səfirliklərə hücum  ehtimalını nəzərə alaraq İstanbuldakı  konsulluqlarını bağlayır və bu hadisələrdə hədəf olmaq istəmirər.

Hasan Oktayın sözlərinə görə, Daxili İşlər naziri Süleyman Soylu hər nə qədər terror hadisələrinin olmayacağını, buna icazə verilməyəcəyini və eyni zamanda Türkiyədə teror aktlarının törədilməyəcəini  desə də,  dekabrın 30-da  Ankaranın mərkəzində Sinan Atəşin öldürülməsi ilə bağlı heç bir söz deməməsi, hadisənin araşdırılmaması,  hətta qatilləri  istiqamətləndirənlərin məlum olmasına rəğmən hərəkətə keçməməsi, konsulluqları ciddi şəkildə narahat etmişdi.

O qeyd edib ki, Avropa Birliyi bu konsulluqların bağlanılması davranışı ilə iqtidara Avropa Birliyinə daxil olma mövzusunda  açıq şəkildə mövqe bildirmiş oldular.

NATO ölkələri  də eyni zamanda  İsveç mövzusunda  Türkiyənin  münasibətinə görə mövqe tutmuş oldular.

“Seçkilərlə əlaqəli  hərəkət olmamaqla yanaşı seçki nəticələrinə təsir edəcək olan  bu mövqe qarşısında Türkiyə seçkiləri deyil, Türkiyənin gələcəyini nəzərə alaraq,   Aİ və NATO ilə yenidən müzakirələri davam etdirməyə və bu səhv başadüşülmələri aradan qaldırmağa çalışmaldırlar”-deyə politoloq vurğulayıb.

İradə Cəlil,  Bizimyol.info