İsrailin baş naziri Benyamin Netanyahunun Kiyevə hərbi yardım etməyi düşündüyünü və münaqişədə vasitəçilik etməyə hazır olduğunu deməsindən sonra Rusiya İsrailə Ukraynaya silah tədarük etməməsi barədə xəbərdarlıq edib.

Bizimyol.info xəbər verir ki, bu barədə Xarici İşlər Nazirliyinin rəsmi nümayəndəsi Mariya Zaxarova danışıb.

“Biz deyirik ki, Ukraynaya silah verən bütün ölkələr başa düşməlidirlər ki, biz bu silahları Rusiya silahlı qüvvələrinə qarşı qanuni hədəf kimi qəbul edəcəyik”, - deyə o, jurnalistlərə bildirib.

Ukraynanın Qərb tərəfdaşları Kiyevə daha çox silah vəd etdiyi üçün Kreml münaqişənin eskalasiyası barədə xəbərdarlıq edib: “Hər hansı cəhdlər - həyata keçirilmiş və ya hətta həyata keçirilməmiş, lakin elan edilmiş əlavə, yeni və ya digər silahların tədarükü - bu böhranın kəskinləşməsinə səbəb olacaq. Və hər kəs bu barədə bilməlidir”, - Zaxarova deyib.

Dünən CNN telekanalına müsahibəsində Netanyahu bildirib ki, ondan Rusiya və Ukrayna arasındakı münaqişədə vasitəçilik etmək istənilib və təkrar soruşulacağı təqdirdə, ABŞ razı olarsa, bunu "tamamilə nəzərdən keçirəcək.

Moskvanın xəbərdarlığı həmçinin, İsrailin ABŞ-ın Ukraynaya on "Havk" zenit batareyası və yüzlərlə ələ keçirən raketin ötürülməsi tələbini rədd etməsi xəbərindən sonra gəlib.

İsrail Rusiya işğalı başlayandan bəri Ukraynaya silah satışına müqavimət göstərib. İsrailin tərəddüdünün əsas səbəblərindən biri, Rusiya qüvvələrinin əsasən hava məkanına nəzarət etdiyi Suriyada hərəkət azadlığını qorumaq üçün strateji ehtiyacının olmasıdır.

Bu məsələ Qüds və Kiyev arasında münasibətləri gərginləşdirdi, çünki ukraynalılar daim İsraildən daha çox müdafiə yardımı istəyirdilər. İsrail Ukraynaya külli miqdarda humanitar yardım, eləcə də digər yardım növləri təqdim edib və Netanyahunun rəhbərlik etdiyi yeni hökumət bu çatdırılmaları davam etdirmək niyyətində olduğunu bildirib. İsrail bu həftə Ukraynaya üç zirehli təcili yardım maşını göndərib.

Qadir, Bizimyol.info