ABŞ-ın İrana qarşı istənilən hərbi əməliyyatı ABŞ-ın müharibəyə girməsi demək olacaq.

Bizimyol.info Newsweek jurnalına istinadən xəbər verir ki, bu barədə İranın BMT-dəki daimi nümayəndəliyi İsfahanda pilotsuz təyyarənin hücumundan sonra məlumat verib.

"İranın nöqteyi-nəzərindən istənilən səviyyədə hərbi variantdan istifadə ABŞ-ın müharibəyə girməsi deməkdir. Hələlik İran bunu mümkünsüz hesab edir", - deyə o, qeyd edib. Missiya əlavə edib ki, Birləşmiş Ştatlar “yanlış hesablayıb müharibəyə başlayarsa”, belə bir münaqişənin nəticələrinə görə Vaşinqton məsuliyyət daşıyacaq.

Eyni zamanda, missiya vurğulayıb ki, “şübhəsiz ki, İran öz təhlükəsizliyini və maraqlarını qorumaq imkanına malikdir”. Bundan əlavə, ABŞ Mərkəzi Komandanlığının (Centcom) sözçüsü Con Mur nəşrə bildirib ki, ölkənin silahlı qüvvələri həftə sonu “İrana hücumda iştirak etməyib”.

Öz növbəsində, Pentaqonun sözçüsü nəşrə ABŞ Silahlı Qüvvələrinin "heç bir zərbə endirmədiyini" və İranda heç bir "əməliyyat" keçirmədiyini bildirib və əlavə edib ki, departament vəziyyətə nəzarəti davam etdirir.

Xatırladaq ki, yanvarın 29-na keçən gecə İranın mərkəzi hissəsindəki İsfahan şəhərində güclü partlayış baş verib. Daha sonra ölkənin Müdafiə Nazirliyi partlayıcı maddə olan kvadrokopterlərdən istifadə etməklə hərbi obyektlərdən birinə silahla hücum cəhdinin uğursuz olduğunu bildirib. Pilotsuz təyyarələrdən biri vurulub, digər ikisi müdafiə tələlərinə düşüb və partlayıb. Həmin gecə ölkənin şimal-qərbində partlayış baş verib, ardınca motor yağı zavodunda yanğın baş verib.

Əl-Cəzirə telekanalı İran rəsmisinə istinadən xəbər verir ki, ilkin əlamətlər İsrailin İsfahan hücumunda iştirakına işarə edir.

Leyla Mirzə