"Moskva Azərbaycan və Ermənistan arasında sülh müqaviləsinin bağlanması ilə bağlı Bakı və İrəvana hərtərəfli təkliflər təqdim edib".

Bizimyol.info xəbər verir ki, bunu Rusiya Xarici İşlər Nazirliyinin sözçüsü Mariya Zaxarova cümə axşamı brifinq zamanı bildirib.

"Bizim hərtərəfli təkliflərimiz Bakı və İrəvana təqdim olunub. Artıq xəbər verdiyimiz kimi, Rusiya xarici işlər nazirinin xüsusi nümayəndəsi İqor Xovayev bu mövzuda məsləhətləşmələr üçün regiona bir sıra səfərlər edib", - deyə o qeyd edib.

Eyni zamanda, Zaxarova sülhlə bağlı danışıqların təfərrüatlarını şərh etməyi yersiz adlandırıb, Moskvanın diqqətini nəticələrə yönəltdiyini qeyd edib: “Biz hansısa xüsusi tanıtım fəaliyyəti ilə məşğul deyilik, onun altında heç nə yoxdur, əksinə hərəkət edirik. Biz gördüyümüz işlərdən danışırıq. Sülh müqaviləsi mövzusunun yüksək həssaslığını nəzərə alaraq, davam edən danışıqların təfərrüatlarını şərh etməyi yersiz hesab edirik. Buna baxmayaraq, diqqətimizi nəticəyə yönəltmişik”, - deyə Xarici İşlər Nazirliyinin sözçüsü bildirib.

Onun sözlərinə görə, Ermənistanla Azərbaycan arasında sülh sazişinin bağlanmasına Qərbin yanaşmaları o qədər də balanslaşdırılmış görünmür: “Qərbin Azərbaycan və Ermənistan arasında sülh sazişinə yanaşmasına gəlincə, bizim fikrimizcə, onlar kifayət qədər balanslı görünmür və açığını desəm, bəzi Qərb vasitəçilərinin rolu barədə danışmaq belə istəmirəm, çünki bu məqsədlə göstərdikləri fəaliyyətə nəzər salsaq, onları sülh vasitəçiləri adlandırmaq mümkün deyil”, - deyə o qeyd edib.

Qadir, Bizimyol.info

P.S: Əslində, Rusiyanı da "sül carçısı" adlandırmaq Azərbaycanda heç kimin ağlına gələcək ifadə deyil. Azərbaycanla Erlənistan arasında yeganə süh yaradacaq qüvvə Azərbaycan əsgəridir.