Britaniya Ukraynaya bir neçə döyüş gəmisi verəcək. Ukrayna hərbçiləri artıq müvafiq təlimlər keçir.

Bizimyol.info xarici mətbuata istinadla xəbər verir ki, bu barədə Ukraynanın Britaniyadakı səfiri Vadim Pristayko “Suspilnıya” müsahibəsində danışıb.

O, artıq gəmilərdən birinə baş çəkdiyini qeyd edib.

"Bizim dənizçilərimiz artıq bununla bağlı təlim keçirlər. Onlar gəmiyə nəzarət edirlər, silahlara nəzarət edirlər. Bir neçə belə gəmi olacaq",- deyə Pristayko detalları açıqlayıb.

Onun sözlərinə görə, Ukraynada genişmiqyaslı müharibə başlayandan sonra Türkiyə Qara dənizdəki boğazları hərbi gəmilər üçün tamamilə bağlayıb.

"Bizim prioritetlərimiz dəyişdi. İndi bizim mina əleyhinə gəmilərə ehtiyacımız var. 2 hazırda işlədiyimiz ilk rəqəmdir. Bunlar Hərbi Dəniz Qüvvələrində xidmətdə olan döyüş gəmiləridir",- deyə Pristayko əlavə edib.

O bildirib ki, gəmilər xüsusi hazırlanacaq və xüsusi silahlarla təchiz olunacaq. Eyni zamanda, Pristaykonun sözlərinə görə, Britaniyada hələ də bizim zabit və dənizçilərimizin təlim keçdiyi gəmilər var.

Xatırladaq ki,  daha əvvəl Baş Qərargah Britaniya gəmilərində ukraynalı dənizçilərin təlimini əks etdirən kadrları nümayiş etdirib. Hərbi Dəniz Qüvvələri 2022-ci ilin may ayından etibarən Ukrayna dənizçilərinin tam heyətlərini hazırlayır və onlara Sandaun sinifli mina əleyhinə döyüş gəmilərini idarə etməyi öyrədir.

Qeyd edək ki,  bir müddət əvvəl Böyük Britaniya 10 000-ə qədər Ukrayna əsgərinə Rusiyanın təcavüzünə qarşı qəhrəmancasına müdafiəni davam etdirməyə kömək etmək üçün döyüş bacarıqları öyrətməyi təklif edib.

Bu barədə Böyük Britaniya və Şimali İrlandiya Birləşmiş Krallığının Müdafiə Nazirliyinə istinadən Ukrayna Silahlı Qüvvələrinin Baş Qərargahı məlumat yayıb.

Qeyd olunur ki, Böyük Britaniya Silahlı Qüvvələrinin naziri, parlamentin üzvü Ceyms Qippi ilə görüşən Ukrayna müdafiə nazirinin müavini Volodimir Qavrilov təlimi müşahidə etmək üçün gəlib.

İlahin, Bizimyol.info