Suriya hakimiyyəti Kiyevin analoji qərarına cavab olaraq, qarşılıqlılıq prinsipinə uyğun olaraq Ukrayna ilə diplomatik münasibətləri kəsmək qərarına gəlib.
Bizimyol.info Ukrayna mətbuatına istinadla xəbər verir ki, bu barədə Suriyanın SANA agentliyi Xarici İşlər Nazirliyindəki mənbəyə istinadən məlumat yayıb.
Suriya Xarici İşlər Nazirliyi əlavə edib ki, Ukrayna hökuməti 2018-ci ildə Kiyevdəki səfirlikdə işləyən suriyalı diplomatların yaşayış icazələrini yeniləməkdən imtina etdiyi üçün onların ölkəsi ilə əlaqələri faktiki olaraq kəsib.
Xatırladaq ki, bir müddət əvvəl Ukrayna Xarici İşlər Nazirliyi (XİN) Rusiya ordusu tərəfindən müvəqqəti olaraq işğal olunmuş Donbas ərazilərinin “müstəqilliyinin” tanınması ilə əlaqədar Suriya ilə diplomatik münasibətləri kəsdiyini elan edib.
Xarici İşlər Nazirliyi xatırladıb ki, Bəşər Əsəd rejiminin Suriya xalqına qarşı cinayətləri ilə əlaqədar Ukrayna hələ 2016-cı ildə Dəməşqdəki səfirliyini bağlayıb.
Həmçinin 2018-ci ildə Suriyanın Kiyevdəki səfirliyinin bağlanması barədə göstəriş verib. Suriyadakı ukraynalıların maraqları Ukraynanın Livandakı səfirliyi tərəfindən qorunur.
Xatırladaq ki, Bəşər Əsəd 2000-ci ildən Suriya prezidentidir. Suriyada prezident seçkiləri mayın 26-da keçirilib. Onların nəticələrinə görə, Əsəd daha 7 il müddətinə yenidən “seçilib”.
Suriyada prezident seçkilərində iştirak üçün 51 nəfər müraciət edib, lakin Rusiyanın dəstəklədiyi Bəşər Əsəddən başqa yalnız iki namizəd finala yüksəlib.
Buna görə də seçkilərdə cəmi üç namizəd iştirak edib: Bəşər Əsəd və daha iki az tanınan namizəd - Suriya Xalq Şurasının keçmiş işlər naziri Abdulla Sallum Abdallah, eləcə də müxalifət nümayəndəsi Mahmud Əhməd Marai.
Müstəqil müşahidəçilər hesab edir ki, Abdullah Sallum Abdullah və Mahmud Əhməd Marai Bəşər Əsədin qələbəsini təmin etmək üçün seçkilərə buraxılıb.
ABŞ, Böyük Britaniya, Fransa, Almaniya, İtaliya və Türkiyə tərəfindən seçkilər legitim hesab edilmir. Qeyd edək ki, Əsəd 22 il əvvəl Suriyaya otuz il rəhbərlik edən atasının yerinə hakimiyyətə gəlib. 2011-ci ildə vətəndaş müharibəsi başlayandan bəri Əsəd ikinci dəfə prezident “seçilir”, Rusiya və İran ona hakimiyyətdə qalmasına kömək edir.
İlahin, Bizimyol.info
