Baş nazir Naftali Bennett koalisiya tərəfdaşlarının ağır cinayətdə ittiham olunan deputatın baş nazir olmasını qadağan edən qanun layihəsini irəli sürmək üçün təzyiqlərinə müqavimət göstərir.

Bizimyol.info İsrail mətbuatına istinadən xəbər verir ki, ədliyyə naziri Gideon Saarın müəllifi olduğu bu qanunun qəbulu ilə keçmiş baş nazir Benyamin Netanyahunun hakimiyyətə qayıtmasının qarşısını almağa çalışır.

Bennett koalisiya liderlərinə bildirib ki, qanun layihəsinin Knessetə təqdim edilməsi koalisiyanın dağılmasına səbəb olacaq. O deyib ki, bu qanunun qəbul edilməsi Yamina millət vəkili Nir Orbaxı Netanyahunun düşərgəsinə doğru itələyəcək.

Bir həftə əvvəl Nir Orbax hakim ittifaqı Knessetdə azlıqda buraxaraq koalisiyadan çıxdığını bəyan edib. Bununla belə, Orbax Knessetin buraxılmasına səs verməyəcəyini və hazırkı Knessetdə “vətənpərvər ruhlu” alternativ hökumət yaratmağa çalışacağını bildirib.

Koalisiyanın bəzi üzvləri hesab edir ki, qanunu qəbul etməyə çalışmaq riskinə dəyər. Çünki Netanyahu növbəti seçkilərdə 61 mandat qazanmasa, o, qanunu dəyişdirə bilməyəcək və faktiki olaraq hakimiyyətdən uzaqlaşdırılacaq.

"Bununla belə, qanun Netanyahuya dəstəyi və onun media və ədliyyə sistemi tərəfindən hədəf alındığı barədə söz-söhbəti artırmaqla mövcud koalisiyaya qarşı oynaya bilər", - deyə "Kanal 12" xəbər verir.

Təklif olunan qanun layihəsi əxlaqsız davranışda və ən azı üç il həbs cəzası tələb edən cinayətdə ittiham olunan Knessetin hər hansı üzvünün hökumət qurmasının qarşısını alacaq.

Belə bir deputat həm də yeni hökumətə etimad səsverməsinə daxil edilə bilməz və ya alternativ baş nazir ola bilməz. Bu, əvvəlki hökumətdə Netanyahu və Benny Gantz arasında hakimiyyəti bölüşmək üçün yaranan, indi isə Yair Lapid tərəfindən davam etdirilən bir mövqedir.

Qadir, Bizimyol.info