İyunun ortalarına olan məlumata görə, Rusiyanın Ukraynaya müdaxiləsi əsas məqama çatıb və Rusiya Federasiyası tərəfindən müharibənin sonrakı istiqaməti üç ssenari üzrə davam etdirilə bilər.

Bizimyol.info xəbər verir ki, bu barədə "CNN" ABŞ kəşfiyyat analitiklərinə istinadən məlumat yayıb.

Agentliyin verdiyi məlumata görə, Birləşmiş Ştatlar Putinin sonda Ukrayna ərazisinin ələ keçirilən hissəsindən gələcək irəliləyiş üçün tramplin kimi istifadə edə biləcəyini güman edir.

Kəşfiyyat iddia edir ki, Rusiya quru qoşunlarının üçdə birinə qədər itki verib, lakin Putin üçün “siyasi cəhətdən təhlükəli addım” sayılan ümumi səfərbərlik olmadan yeni nailiyyətlər əldə etməyə çalışacaq.

Nəşrin məlumatına görə, hazırda üç mümkün ssenari nəzərdən keçirilir:

Ssenari 1:

Rusiya Donbasda kiçik uğurlar qazanmağa davam edə bilər. Bu, daimi yerli irəliləyişlər, artilleriya və şəxsi heyətin sayının üstünlüyünə görə bəlkə də yavaş irəliləyiş deməkdir.

Ssenari 2:

Müharibə illərlə olmasa da, dayandırılaraq "nə sülh, nə müharibə" şəraitində qala bilər. Bu, hər iki tərəf üçün böyük itkilərə səbəb olacaq və Qərb üçün dünya iqtisadiyyatının tükənməsi səbəbindən böhranın kəskinləşməsi təhlükəsini xeyli artıracaq.

Ssenari 3:

Bu ssenari qeyri-mümkün hesab olunur. Söhbət ondan gedir ki, işğalçı ölkənin prezidenti Putin işğalın yaxın vəzifələrini yenidən nəzərdən keçirmək qərarına gəlir, “qələbə” elan edir və hərbi əməliyyatları minimuma endirməyə çalışır.

Ukraynanın hələ Donbasda genişmiqyaslı əks-hücum üçün kifayət qədər resursu olmadığı üçün bu cəbhədə hərbi əməliyyatların aparılması təşəbbüsü Rusiyada qalır və ssenari seçimini Kreml edir.

Ukrayna üçün yardım:

9 may 2022-ci ildə ABŞ prezidenti Co Bayden Ukrayna üçün "Lend-Liz" (borc-icarə) Aktını imzalayıb. Ukrayna tərəfi hərbi texnika və silahları icarəyə götürə, pulunu Rusiya üzərində qələbədən sonra ödəyə ya da sadəcə olaraq, sağ qalan texnikanı geri verə biləcək.

Ekspertlər əmindirlər ki, Ukraynanın alacağı borc-icarə silahları qüvvələr balansını kökündən dəyişəcək. Ona görə də indi Moskva fürsətdən istifadə edərək Donbasda daha da çox əraziləri ələ keçirməyə çalışır.

15 iyun 2022-ci ildə NATO-nun baş katibi Yens Stoltenberq Ukraynanın daha çox ağır silahlar alması lazım olduğunu açıqlayıb.

Qadir, Bizimyol.info