Qarabağ Gündəm Cəmiyyət Hadisə Siyasət Dünya Sağlamlıq Sosial-İqtisadi
Təhlükəli şprislərin ölkəyə idxalı ilə bağlı açıqlamaya rəsmi reaksiya
Təhlükəli şprislərin ölkəyə idxalı ilə bağlı açıqlamaya rəsmi reaksiya

Bir müddət əvvəl “Azad İstehlakçılar Birliyi”nin sədri Eyyub Hüseynov Bizimyol.info xəbər portalına müraciət edərək, Bakıda təhlükəli şprislərin satıldığını bildirmişdi. Təşkilat sədrinin iddiaları ilə bağlı Aanalitik Ekspertiza Mərkəzinə göndərdiyimiz sorğu ilə əlaqədar Bizimyol.info xəbər portalına bildirilib ki, “Azad İstehlakçılar Birliyi”nin sədri Eyyub Hüseynovun Analitik Ekspertiza Mərkəzinə ünvanladığı eyni məzmunlu məktubda cavablandırılıb və iddiaları əsassızdır.

“Sorğunuza əsasən, Eyyub Hüseynovun qeyd etdiyi (DR. PARA, REGULA) müxtəlif istehsalçılara məxsus, birdəfəlik istifadə olunan tibbi şpris nümunələri Azərbaycan Respublikasına idxal olunarkən Analitik Ekspertiza Mərkəzinə, idxalına icazə verilməsi üçün rəsmi müraciətlə daxil olub. Tibbi şpris nümunələri Mərkəzə daxil olarkən mənşə sertifikatı, keyfiyyət sertifikatı, invoys (mənşə sertifikatında, müqavilədə və müraciət məktubunda qeyd olunan məlumatların uyğunluğu yoxlanılır) və ikitərəfli müqavilələr müvafiq ekspertlər tərəfindən araşdırılıb. Mənşə sertifikatının (certificate of origin) mövcudluğu və uyğunluğu aidiyyatı qurumun (müvafiq ölkənin ticarət palatası tərəfindən yaradılmış rəsmi internet saytı) rəsmi saytında (http://check.ccpiteco.net və http://origin.customs.gov.cn) yoxlanılmış, mənşə sertifikatında qeyd olunan istehsalçıya verilmiş keyfiyyət sertifikatının uyğunluğu müvafiq akkreditasiya qurumunun rəsmi internet saytında yoxlanılmış və doğruluğu müəyyən edilmişdir” - deyə Analitik Ekspertiza Mərkəzindən bildirilib.

Qeyd edilib ki, idxal sənədləri araşdırıldıqdan sonra tibbi şpris nümunələri keyfiyyətinin yoxlanılması məqsədilə Analitik Ekspertiza Mərkəzinin laboratoriyasına təqdim edilib. Tibbi şpris nümunələri ISO 7886-1 – “Steril, birdəfəlik istifadə üçün şprislərə dair tələblər” beynəlxalq standartın tələblərinə və istehsalçıları tərəfindən təqdim edilmiş, hər bir seriyaya dair keyfiyyət sertifikatlarının göstəricilərinə əsasən mütəxəssislər tərəfindən analiz edilib və əsas parametrlərdən olan sterillik və yoxlanılıb, digər keyfiyyət parametrlərində uyğunsuzluq aşkar edilməyib.

Həmçinin bildirilib ki, ISO 7886-1 – “Steril, birdəfəlik istifadə üçün şprislərə dair tələblər” beynəlxalq standartının tələblərinə əsasən birdəfəlik steril şprislərin hazırlanması və yağlanması üçün istifadə edilən materiallar xüsusi olaraq qeyd olunmur. Belə ki, sözügedən standarta əsasən onların seçimi müəyyən qədər fərdi istehsalçıların istifadə etdiyi dizayn, istehsal prosesi və sterilizasiya üsullarından asılıdır. Şprisin materialları yalnız tibbi məqsədlər üçün nəzərdə tutulan və inyeksiya mayeləri ilə uyğun olmalıdır. Əks halda istisna hal olaraq istifadə üçün nəzərdə tutulan qablaşmanın üzərindəki etiketdə qeyd olunmaqla istifadəçinin diqqətinə çatdırılmalıdır. “Paraldehidlə birlikdə istifadə etməyin” (Do not use together with paraldehyde) yazısı bu səbəbdən qablaşmanın üzərində qeyd edilib. Sözügedən standartın tələblərinə əsasən steril birdəfəlik istifadə üçün nəzərdə tutulan şprislərin silindrlərinin divarları dozalanmanın rahat oxunması üçün şəffaf olmalıdır. ISO 7886-1 beynəlxalq standartında porşenin rənginə tələb mövcud deyildir. Təqdim edilmiş steril birdəfəlik istifadə üçün şpris nümunələrində porşenin silindrdən çıxmasının qarşısını alan məhdudlaşdırıcılar mövcuddur.

Aparılan tədqiqatlar nəticəsində sözügedən nümunələrin ölkəyə idxal edilməsinə dair icazə məktubları verilib. Həmçinin qeyd edək ki, keçən müddət ərzində vətəndaşlardan (tibb işçiləri də daxil olmaqla) şprislərin keyfiyyəti ilə bağlı Analitik Ekspertiza Mərkəzinə hər hansı şikayət daxil olmayıb.

AEM-dən verilən məlumatda həmçinin qeyd edilib ki, nəzarət mexanizmlərindən biri əczaçılıq müəssisələrində nəzarət yoxlamalarıdır. Əczaçılıq müəssisələrində nəzarət yoxlamaları “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” 2 iyul 2013-cu il tarixli Azərbaycan Respublikası Qanununun və Azərbaycan Respublikası Prezidentinin 2011-ci il 15 fevral tarixli Fərmanı ilə təsdiq edilmiş “Sahibkarlıq sahəsində aparılan yoxlamaların vahid məlumat reyestrinin forması və aparılması qaydası haqqında Əsasnamə”nin tələblərinə uyğun olaraq keçirilir.

Qanunvericiliyə uyğun olaraq plan üzrə (növbəti) və daxil olan şikayət, məlumat və müraciətlər əsasında plandankənar (növbədənkənar) yoxlamalar keçirilir: “Bu səbəbdən vətəndaşların aptek təşkilatlarından əldə etdikləri dərman vasitələri və ya tibbi vasitələrdə hər hansı şübhəli hal ilə rastlaşdığı təqdirdə, məhsulun özünü, çekini, aptekin ünvanını Analitik Ekspertiza Mərkəzinə təqdim etmələrini xahiş edirik”,- deyə mərkəzdən bildirilib.

İlahin, Bizimyol.info

Paylaş »
Son xəbərlər
Bütün xəbərlər »