ABŞ Avropada 10 mindən çox əsgərini rotasiya edəcək. Köçürülmələr yaxın həftələrdə baş tutacaq.

Bizimyol.info xəbər verir ki, bunu Pentaqonun spikeri Con Kirbi brifinq zamanı deyib.

"Bölmələr məsuliyyətin düzgün təhvil verilməsinə uyğun olaraq öz dislokasiya yerlərinə qayıdacaq. Bu köçürmə yaxın həftələrdə, hətta bu yayın qarşıdakı aylarda baş tutacaq", - deyə o bildirib.

"ABŞ NATO-nun şərq cinahında güclü çəkindirmə və müdafiə mövqeyini dəstəkləmək kursunu davam etdirir. ABŞ-ın müdafiə naziri Lloyd Ostin Avropa əməliyyatlar mövqeyində ordu hissələrini əvəz etmək üçün önümüzdəki aylarda 10 mindən çox hərbçinin yerləşdirilməsinə göstəriş verib",- deyə Kirbi qeyd edib.

Texas ştatının Fort Bliss şəhərindən təxminən 1800 əsgərdən ibarət 1-ci Zirehli Diviziya Döyüş Aviasiya Briqadası Birləşmiş Ştatların Atlantic Resolve öhdəliyinə dəstək olaraq 1-ci Hava Süvari Briqadasını əvəz edəcək.

Kentukki ştatının Fort Kempbell şəhərindən olan 101-ci Hava Desant Diviziyasının 2-ci Piyada Briqadası Döyüş Komandası 82-ci Hava Desant Diviziyasının Polşadakı 3-cü Piyada Briqadası Döyüş Komandasını əvəz etmək üçün təxminən 4200 əsgəri yerləşdirəcək.

Texas ştatının Fort Hud şəhərindən olan 3-cü Zirehli Briqada Döyüş Komandası, Almaniyadakı 3-cü Piyada Diviziyasının 1-ci Zirehli Briqadasını əvəz etmək üçün təxminən 4200 əsgər yerləşdirəcək.

Kentukki ştatının Fort Kempbell şəhərindən olan 101-ci Hava Desant Diviziyasının qərargahı EUCOM-un cavabdehlik sahəsindəki 82-ci Hava Desant Diviziyasının qərargahını əvəz etmək üçün yerləşdiriləcək. Bu, təxminən 500 əsgərdir.

Pentaqon bunun Rusiyanın Ukraynada apardığı müharibə ilə əlaqəsi olmadığını bildirib: "Bu sadəcə, orduda daim tətbiq olunan rotasiya tədbiridir",- deyə ABŞ Müdafiə Nazirliyindən bildirilib.

Qadir, Bizimyol.info