Gürcüstanın məhkum olunmuş eks-prezidenti Mixail Saakaşvili Rustavi şəhərindəki 12 saylı cəzaçəkmə müəssisəsindən müayinə və lazım gəldikdə müalicə olunmaq üçün Tbilisidəki penitensiar sistemə xidmət edən Vivamedi Tibb Mərkəzinə köçürülüb.

Bizimyol.info xəbər verir ki, bu barədə "Mtavari Arkhi TV" məlumat verib.

Klinika binasında təhlükəsizlik tədbirləri gücləndirilib, girişdəki ərazi polis lenti ilə dövrələnib.

Dünən axşam Saakaşvilinin qohumları, yaxınları və tərəfdarları onun transferini gözləsələr də, məlum olub ki, klinikada eks-prezidenti gözləmək üçün saatlarla boş yerə vaxt keçiriblər. Axşam saatlarından tibb məntəqəsində hazırlıq işləri aparılıb.

Saakaşvilinin mülki klinikaya köçürülməsi təklifini çərşənbə axşamı ədliyyə naziri Rati Breqadze səsləndirib. Keçmiş prezident bununla razılaşıb. Lakin ailə üzvlərinin, Empati Mərkəzinin həkimlərinin, deputatların və vəkillərin səfərlərinə şərait yaradılması, habelə anasının daimi onun yanında olmasını təmin etmək şərti ilə köçürülmənin baş tuta biləcəyini bildirib.

Transferdən bir qədər əvvəl "Vivamedi" rəhbərliyi eks-prezidentin anası Giuli Alasanianın ilə əlaqə saxlayıb və görüş təyin edib. Görüşdən sonra Alasania media üçün qısa açıqlama verib. Onun sözlərinə görə, klinika yaxşıdır, lakin Saakaşvilinin xaricdə müalicə imkanının təmin edilməsi məsələsi hələ də gündəmdədir.

Vəkillər, ailə üzvləri və Saakaşvilinin özü yekdilliklə bildiriblər ki, cəzaçəkmə müəssisəsində ona düzgün münasibət göstərilməyib, ölüm-dirim astanasındadır, ona görə də eks-prezidentin xaricdə müalicəyə ehtiyacı var.

Öz növbəsində Ədliyyə Nazirliyi dəfələrlə bəyan edib ki, Saakaşvilinin özü onun vəziyyətini çətinləşdirir, çünki o, ona yazılan bəzi dərmanlardan imtina edir.

Saakaşvili cəzasını çəkərkən ikinci dəfə həbsxanadan xəstəxanaya aparılıb. Eks-prezidentin 2021-ci il oktyabrın 1-də həbsindən dərhal sonra elan etdiyi, 50 gün davam edən aclıq aksiyası nəticəsində səhhəti pisləşib. Aclıq aksiyasının 39-cu günü, 2021-ci il noyabrın 8-də Saakaşvili Tbilisidəki Qdansk həbsxanasının xəstəxanasına, noyabrın 19-da isə Qori şəhərindəki hərbi hospitala yerləşdirilib. Yalnız bundan sonra aclıq aksiyasına son qoyub.

Xalq müdafiəçisi yanında ekspert qrupunun həkimlərinin sözlərinə görə, Saakaşvili hazırda katabolik vəziyyətdədir. Zülal aclığı fonunda eks-prezidentin əzələ kütləsi azalıb, halsızlıq yaranıb. Səbəb, həkimlərin fikrincə, davamlı post-travmatik pozğunluq ola bilər - depressiya və anoreksiya.

Saakaşvili 2021-ci il sentyabrın 29-da Ukraynadan gizli şəkildə Gürcüstana qayıdıb və oktyabrın 1-də Tbilisidə saxlanılıb. Səkkiz ildən sonra vətənə qayıdan Saakaşvili Batumi və Kutaisiyə səfər edib.

Tbilisi Şəhər Məhkəməsi Saakaşvilini üç ildən beş ilədək həbs cəzası gözlədiyi sərhədi qanunsuz keçmə işi ilə yanaşı, ona qarşı daha iki işə - dövlət vəsaitinin mənimsənilməsinə və 2007-ci il noyabrın 7-də etiraz aksiyasının dağıdılmasına dair işə baxır.

O, hazırda iki cinayət işi üzrə - deputat Valeri Gelaşvilinin döyülməsi və bank işçisi Sandro Qirqvlianinin qətlində təqsirləndirilən şəxslərin əfv olunması ilə bağlı cəza çəkir.

Qadir, Bizimyol.info