Qazaxıstan Prezidenti Kasım-Comart Tokayevin mayın 10-11-də Türkiyəyə rəsmi səfəri planlaşdırılır.

Bizimyol.info xəbər verir ki, bu barədə çərşənbə axşamı dövlət başçısının mətbuat xidməti Türkiyə lideri Rəcəb Tayyib Ərdoğanla telefon danışığından sonra məlumat verib.

“Rəcəb Tayyib Ərdoğan bildirib ki, Kasım-Comart Tokayevin mayın 10-11-də Türkiyəyə planlaşdırılan rəsmi səfəri ölkələr arasında hərtərəfli strateji tərəfdaşlığın genişləndirilməsində mühüm mərhələ olacaq. Dövlətimizin başçısı Ankarada keçiriləcək danışıqlara bu cür yanaşma ilə razılaşdı", - deyə mətbuat xidmətinin məlumatında bildirilir.

Prezidentlər ticarət-iqtisadi, investisiya, mədəni-humanitar əməkdaşlığın daha da gücləndirilməsini vurğulayaraq ikitərəfli strateji tərəfdaşlığın inkişaf perspektivlərini müzakirə ediblər.

"Qazaxıstan Prezidenti Türk Dövlətləri Təşkilatının iqtisadi, humanitar və mədəni əlaqələrin genişləndirilməsi baxımından mühüm rolunu qeyd edib", - mətbuat xidməti qeyd edib.

Qadir, Bizimyol.info