Qarabağ Gündəm Cəmiyyət Hadisə Siyasət Dünya Sağlamlıq Sosial-İqtisadi
Azərbaycanda az miqdarda narkotikə görə cinayət məsuliyyəti ləğv edilir
Azərbaycanda az miqdarda narkotikə görə cinayət məsuliyyəti ləğv edilir

Azərbaycanda az miqdarda narkotikə görə cinayət məsuliyyəti ləğv edilir.

Bu, Milli Məclisin bu gün keçirilən iclasında III oxunuşda müzakirəyə çıxarılan Cinayət və İnzibati Xətalar məcəllələrinə təklif olunan dəyişikliklərdə əksini tapıb.

Belə ki, qanunsuz olaraq narkotik vasitələrin, psixotrop maddələrin satış məqsədi olmadan hazırlanmasına, əldə edilməsinə, saxlanılmasına, daşınmasına və ya göndərilməsinə görə hansı hallarda cərimə, hansı hallarda azadlıqdan məhrumetmə cəzaları tətbiq olunacağı yenidən müəyyənləşir.

Hazırda qüvvədə olan Cinayət Məcəlləsinə əsasən, satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə, saxlama, hazırlama, emal etmə, daşıma bir ildən üç ilədək müddətə azadlığın məhdudlaşdırılması və ya üç ilədək müddətə azadlıqdan məhrum etmə ilə cəzalandırılır. İnzibati Xətalar Məcəlləsinə əsasən isə, qanunsuz olaraq narkotik vasitələrin, psixotrop maddələrin istehlakına, satış məqsədi olmadan şəxsi istehlak miqdarında hazırlanmasına, əldə edilməsinə, saxlanılmasına, daşınmasına və ya göndərilməsinə görə üç yüz manatdan dörd yüz manatadək məbləğdə cərimə edilir, işin hallarına görə və xətanı törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda isə iki ayadək müddətə inzibati həbs tətbiq edilir.

Cinayət Məcəlləsinə təklif olunan dəyişikliklə isə satış məqsədi olmadan qanunsuz olaraq narkotik vasitələri və ya psixotrop maddələri xeyli miqdarda əldə etmə, saxlama, hazırlama, emal etmə, daşıma bir ildən üç ilədək müddətə azadlığın məhdudlaşdırılması və ya üç ilədək müddətə azadlıqdan məhrum etmə ilə cəzalandırılacaq. Həmin əməllər külli miqdarda törədildikdə üç ildən səkkiz ilədək müddətə azadlıqdan məhrum etmə ilə cəzalandırılacaq. Bu əməllər xüsusilə külli miqdarda törədildikdə səkkiz ildən on beş ilədək müddətə azadlıqdan məhrum etmə ilə cəzalandırılacaq.

Qanunsuz olaraq narkotik vasitələrin, psixotrop maddələrin istehlakına, satış məqsədi olmadan az miqdarda hazırlanmasına görə isə inzibati məsuliyyət müəyyənləşir. Beləliklə, İnzibati Xətalar Məcəlləsinə təklif olunan dəyişikliyə görə, qanunsuz olaraq narkotik vasitələrin, psixotrop maddələrin istehlakına, satış məqsədi olmadan az miqdarda hazırlanmasına, əldə edilməsinə, saxlanılmasına, daşınmasına və ya göndərilməsinə görə üç yüz manatdan dörd yüz manatadək məbləğdə cərimə edilir, işin hallarına görə və xətanı törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda isə iki ayadək müddətə inzibati həbs tətbiq ediləcək.

Dəyişiklik layihəsi səsverməyə çıxarılaraq III oxunuşda qəbul edilib.

Narkomaniya üzrə ekspert Emil Maqalov qərarla bağlı fikirlərini Bizimyol.info ilə bölüşüb. O bildirib ki, bununla belə başa düşülür ki, narkotik istifadəçilərinin cinayətkar yox, xəstə olduqları ilə razışalırıq, həmin insanların dərman tapmadığı üçün cinayətkara çevrildiyini də anlayırıq.

Emil Maqalov Emil Maqalov

“Çünki insanlarda bir neçə istifadədən sonra fiziki asılılıq yaranır, həmin narkotik istifadəçisi artıq xəstəyə çevrilir və ona həmin doza və yaxud narkotik əvəzedicisi lazım olur. Həmin şəxs ağrını kəsmək üçün narkotikdən istidafə etmək məcburiyyətində olur və ona mütləq şəkildə müalicə lazımdır.

Məsələ ondadır ki, həmin adamlar həbs olunmadıqda müalicəyə göndərilməlidirlər. Çünki bilməliyik ki, narkotik istifadəçiləri potensial narkotacirdir. Narkodispanserlərimizin isə sayı çox azdır.

Məsələn, Bakıda 3000 narkotik istifadəçisi varsa, 380 nəfərlik yer, Sumqayıtda 1000 nəfər narkotik istifadəşisi varsa, 28 yer var. Məsələ burasındadır ki, biz ilk növbədə narkodispanserlərimizin sayını çoxaltmalıyıq.

Təəssüflər olsun ki, dövlətin reabilitasiya mərkəzləri yoxdur, özəl sektorlarda isə bir ayı 1500 manatdan başlayır. Buna isə hər narkotik istifadəçisinin imkanı çatmır”.

Ekspert sonda bildirib ki, yuxarıda qeyd olunnan məsələlər həll olunmamış hansısa qanuna baxmağı məqsədə uyğun saymır.

Leyla Mirzə, Bizimyol.info

Paylaş »
Son xəbərlər
Bütün xəbərlər »