Mühasirəyə alınmış Mariupolda rus işğalçıları mənzilləri qarət edir, şəhər sakinlərini öldürür və zorlayırlar.

Bizimyol.info xəbər verir ki, bu barədə “Telegram”da hazırda Mariupolun müdafiəsində olan "Azov" alayının döyüşçüləri məlumat verib.

“Biz bilirik ki, şəhərin müvəqqəti işğal olunmuş ərazilərində bu cinayətkarlar mülki şəxslərin mənzillərini qarət edir, şəhər sakinlərini öldürür və zorlayırlar. İndi bu pislikləri azaltmaqla məşğuluq. Putinin muzdlularından birində ABŞ dolları və çoxlu sayda müxtəlif qızıl bəzək əşyaları, o cümlədən müxtəlif ölçülü nişan üzükləri aşkar edilib. “Azov” döyüşçüləri Putinin muzdlularından tapdıqları bütün qiymətli əşyaların sahibləri müəyyən olunarsa, onlara qaytarılacaq və ya ruslardan tapılan vəsaitlə Mariupoldan olan qaçqınlara yardım edəcəklər”, – döyüşçülər bildirib.

Rusiya təcavüzünün Mariupolda ən böyük humanitar fəlakətlərdən birinə səbəb olduğu bildirilir. İşğalçılar silahsız sakinləri bombalayır və yardımın qarşısını alır. Mariupol meri Vadim Boyçenkonun sözlərinə görə, martın 27-nə olan məlumata görə, Mariupolda mülki vətəndaşların sayı təxminən 5000 nəfər, o cümlədən 210-a yaxın uşaqdır. Rus işğalçıları tərəfindən mühasirəyə alınan Mariupolda hazırda 160 minə yaxın dinc sakin həyatlarını xilas etmək üçün kömək gözləyir.

Mariupol rus qoşunları tərəfindən nəhəng xarabalığa çevrilib, sakinlər aclıqdan küçələrdə huşlarını itirirlər, düşmən hava bombaları onları bomba sığınacaqlarında diri-diri basdırır.

Baş nazirin müavini - Ukraynanın müvəqqəti işğal olunmuş ərazilərinin reinteqrasiyası üzrə nazir İrina Vereşçuk bildirib ki, rus qoşunları şəhəri demək olar ki, darmadağın edib, ona görə də bütün mülki əhalinin təxliyəsi zəruridir.

Qadir, Bizimyol.info