ABŞ dövlət katibi Entoni Blinken Ukraynanın Rusiya ilə qarşıdurmada qələbə çalacağına əmin olduğunu bildirib. Onun sözlərinə görə, Putin yəqin ki, ukraynalıların belə “qeyri-adi müqavimətini” gözləmirdi.

Bizimyol.info xəbər verir ki, o, bu barədə BBC-yə müsahibəsində danışıb.

“Əgər Moskva Ukraynada hökuməti hansısa yolla devirmək, onun marionet rejimini qurmaq niyyətində olsa, 45 milyon ukraynalı bu və ya digər şəkildə bundan imtina edəcək”, - deyə Blinken bildirib.

ABŞ diplomatı deyir ki, müharibə artıq Putinin planlarına uyğun getməyib. Ukrayna qoşunlarının güclü müqaviməti rusların 9 gün ərzində ölkə daxilində hərəkət etməsinə mane olub.

ABŞ dövlət katibi hərbi əməliyyatlar tam dayandırılana qədər ABŞ-ın Rusiyaya təzyiqlərini davam etdirəcəyini bildirib.

"Ukraynanın qalib gələcəyinə əminsinizmi", - sualına o, belə cavab verib: "Zamanla, əlbəttə. Bunun nə qədər davam edəcəyini sizə deyə bilmərəm. Bunun nə qədər vaxt aparacağını da bilmərəm.  Rusiya Ukraynaya hücum edib, bu çox şey deyir", - deyə dövlət katibi qeyd edib.

Qadir, Bizimyol.info