Qarabağ Gündəm Cəmiyyət Hadisə Siyasət Dünya Sağlamlıq Sosial-İqtisadi
Tanınmış heykəltəraş, rəssam vəfat edib
Tanınmış heykəltəraş, rəssam vəfat edib

Bu gün 04 mart 2022-ci il, səhər saatlarında tanınmış heykəltəraş, Azərbaycan SSR əməkdar rəssamı, Bakının simvollarından biri olan “Bəhram Gur əjdahanı öldürür” fontan-kompozisiyasının həmmüəllifi, Azərbaycan İnşaat Mühəndisləri İnstitutunun təsviri incəsənət kafedrasının professoru Albert Zaman oğlu Mustafayev 91 yaşında vəfat edib.

Bizimyol.info xəbər verir ki, bu barədə mərhumun qohumu Məmməd Əhmədoğlu məlumat verib.

A.Mustqfayev əvvəlcə Əzim Əzimzadə adına Rəssamlıq Məktəbində təhsil almışdır.

1956 – 1960-cı illərdə isə SSRİ Rəssamlıq Akademiyası nəzdində İlya Repin adına Leninqrad Boyakarlıq, Heykəltəraşlıq və Memarlıq İnstitutunda təhsil alıb və fərqlənmə diplomu ilə bu məşhur institutu bitirib.

1966-cı ildə Çingiz İldırım adına Azərbaycan Politexnik İnstitutunun təsviri sənət kafedrasında assistent, sonra müəllim işləyib.

1975-ci ildən – Azərbaycan Politexnik İnstitutunun bazasında Azərbaycan İnşaat Mühəndislər İnstitutunun yaradılmasından sonra, bu yeni ali müəssisəsinin təsviri incəsənət kafedrasına əvvəl baş müəllim, 1983-cü ildən dosent, daha sonra isə professor vəzifəsini tutub.

1974-cü ildə Bakı şəhərinin simvolu və diplom işi olmuş “Bəhram Gur əjdahanı öldürür” fontan-kompozisiyasının həmmüəllfi kimi tanınmışdır.

Nizami Kino Mərkəzi (Bakı) binasının fasadında Nizami Gəncəvinin və Məhsətinin monumental heykəllərini yaratmışdır.

Hələ 1959-cu ildə – Leninqrad Boyakarlıq, Heykəltəraşlıq və Memarlıq İnstitutunda oxuyarkən, kurs işi olaraq gildən hündürlüyü cəmi 30 santimetr olan “Bəhram Gur əjdahanı öldürür” kompozisiyasını hazırlayıb. 1960-cı ildə isə həmin vaxt Moskva Ali Rəssamlıq-Sənaye Məktəbində təhsil alan Aslan Rüstəmov və Tbilisi Rəssamlıq Akademiyasını yenicə bitirmiş Qorxmaz Sücaəddinovla birlikdə qərara gəlirlər ki bu kompozisiyanı yenidən işləyib Bakının fontan-heykəllərinin hazırlanması üzrə müsabiqəyə təqdim etsinlər. “Bəhram Gur əjdahanı öldürür” fontan-kompozisiyası üç gənc heykəltəraşın birgə əsəri kimi müsabiqəyə təqdim olunur. Bakı Şəhər Xalq Deputatları Soveti İcraiyyə Komitəsinin sədri Əliş Ləmbəranski gənc heykəltəraşların hazırladıqları eskizi çox bəyənir. Heykəl bürüncdən tökülür və Bakının ən görməli yerlərindən birində ucaldılır.

Bakıda: Nizami Gəncəvi Kino Mərkəzinin baş fasadındakı “Nizami Gəncəvi” heykəli; Lütfəli Abdullayevin xatirə lövhəsi, Lətif Kərimovun xatirə lövhəsi; Şəkidə: Böyük Vətən müharibəsində həlak olmuş şəkililərin döyüş şöhrətini əbədiləşdirilməsi üçün 1974-cü ildə yaradılmış “Xatirə ansamblı”nın ərazisindəki “Ana heykəli”. Mingəçevirdə: V.İ.Leninin heykəli. Şuşada: Molla Pənah Vaqifin məqbərəsində Molla Pənah Vaqifin büstü. 2009-cu ildə “Şəki xanı Məhəmmədhüseyn xan Müştaq” heykəlinin eskizini hazırlamışdır. Sonuncu işi 2014-cü ildə xalq şairi Bəxtiyar Vahabzadəni büstünü hazırlamışdır. Bir neçə il əvvəl isə o sonuncu əsəri hesab etdiyi özünün baş daşının müəllifi olmuşdur. Yüksək fitri istedadına və bacarıqlı heykəltaraş olmasına görə həmkarları və mədəniyyət işçiləri arasında böyük hörmətə sahib olsa da nədənsə layiq olduğu mükafatlar verilib.

A.Mustafayevin sonuncu mükafatı - 25 yanvar 2021-ci ildə Azərbaycan Prezidenti İlham Əliyev Albert Mustafayevlə bağlı sərəncamına əsasən, Azərbaycanda heykəltəraşlıq sahəsində uzunmüddətli səmərəli fəaliyyətinə görə Albert Zaman oğlu Mustafayev “Azərbaycan Respublikası Prezidentinin fəxri diplomu” ilə təltif edilib.

Vəsiyyətinə görə Albaert Mustafayev doğma Şəkidə “Qax dayanacağı” adlı yerdə olan qəbristanlıqda dəfn ediləcəkdir.

Allah rəhmət eləsin, Amin!

Paylaş »
Son xəbərlər
Bütün xəbərlər »