Qarabağ Gündəm Cəmiyyət Hadisə Siyasət Dünya Sağlamlıq Sosial-İqtisadi
Dama-dama göl olan 15 qəpiklər – Deputatın çıxışı xalqı qəzəbləndirdi
Dama-dama göl olan 15 qəpiklər – Deputatın çıxışı xalqı qəzəbləndirdi

Milli Məclisin deputatı “Azərittifaq”ın sədri, Bakı Biznes və Kooperasiya Universitetinin sahibi Eldar Quliyev çörəyin və benzinin bahalaşması barədə danışarkən bildirib ki, “Dövlətin xərcləri çoxdur, 15 qəpiklə heç kim kasıblamaz, dövlətin xərclərini ödəmək lazımdır”.

Deputatın bu çıxışı "toxun acdan xəbəri olmaz" misalının boş yerə yaranmadığından xəbər verir. Deputatın bu fikri cəmiyyətdə kəskin narazılıq yaradıb. Hər dəfə bahalaşma başlayarkən hansısa məmurların işinin öhdəsindən gələ bilməməsini, öz faydasını güdməsini dövlətin ayağına yazıb, xal toplamağa çalışmaq deputat əxlaqına sığışmır.

Eldar Quliyev Eldar Quliyev

Deputat Milli Məclisə xalqın səsini eşitdirmək üçün seçilib, xalq isə bahalaşmadan narazıdır. Doğrudur, pandemiyadan keçmişik, müharibədən keçmişik, dövlətin xərcləri olub. Amma bütün bunlar baş verərkən xalq bir kənarda dayanıb baxmırdı, baş verən bütün ağır, əziyyətli olaylar xalqın çiyinlərində daşınıb. Aylardır əhali bahalaşmadan gileylənir, bir ildə 4 dəfə yanacaq qiymətlərində artım qeydə alınıb, söhbət gəzir ki, enerji qiymətlərində də yenidən yüksəliş olacaq. Söhbət çörəyin qədrini bilsə də, qiymətini bilməyən deputatın dediyi 15 qəpikdən getmir, real şəkildə kəskin bahalaşma var. Bu gün bir marketə 50 manatla girib 3-4 yüngülvari ərzaqla çıxa bilirsən, o da sənə bir neçə gün yetə ya yetməyə. Aylardır deyirik ki, marketlər hər həftə xırda xırda qiymət artımına gedib. Öncə gözümüzə görünmürdü, o qədər ağ elədilər ki, indi də gözümüz görmür. Çünki marketə getməyə üzümüz gəlmir, evdəki uşaqdan utanırıq. 15 qəpiklər toplanıb sərvət olub. Bizim yox, başqalrının sərvəti.

15 qəpik bir şey deyilsə, dövlət də qaldırmasın o 15 qəpiyi. 15 qəpik o qədər azdırsa hər gün qazancımızın üstünə 15 qəpik artırılsın. Dövlətin "qeydinə qalan" bu deputat dövləti dağıdanlardan, karvanı malı, sarbanı şalı ilə yeyənlərin neçəsini ifşa edib? Vətəndaş 15 qəpiyin üstünə 15 qəpik də qoyub 30 qəpiyə metro, yaxud avtobusa bilet əldə edir. Bu gün 30 qəpiyi tapıb metroya verə bilməyənimiz var, bu gün əmək haqqından hər ay 2 faiz kəsilib amma İcbari Tibbi Sığorta xidməti ala bilməyən, xəstəlikdən əziyyət çəkən milyonlarla insanımız var. Onlardan biri də hər zaman haqqı deyən, amma elə buna görə də AMEA rəhbərliyinin düşmən kimi gördüyü professor İdris Abbasovdur. O da deputatın fikirlərinə etirazını bildirib, üsyan səsini qaldırıb:

İdris Abbasov Professor İdris Abbasov

“Sənin üçün hava xoşdur. Millət qırılsa da, cəhənnəmə ki?! Sən deputat kimi eyş-işrətdəsən, dürüst çalışan, alim isə dilənçi günündədir. Şəxsən mən imkansızlıqdan tibbi müayinəyə gedə bilmirəm. Acıq-qıcıq verirsən millətə? De ki, dövlətin milyardları filan-filan məmurların ciblərindədir. Qorxursan ki, mandatdan məhrum edərlər? De də, ay dövlət “sevdalısı”, millət “aşiqi”! Yetim xalqın yaxasından yapışmaq asandır, düzün danışmaq çətin”.

Xatırladaq ki, 2 gün öncə benzinin qiymətinin 15 qəpik artırılması cəmiyyət tərəfindən narazılıqla qarşılansa da , hökumət qiymətin xarici bazarlarda tənzimləndiyini bildirib.

İlhamə

Paylaş »
››› Türkiyədə dolların rekord bahalaşması Azərbaycana təsir edəcəkmi...
››› Putin Azərbaycan və Ermənistan rəhbərlərinin çıxışlarına münasibət bildirib
››› Lotereyada udacağını yuxuda gördü və milyonçu oldu
››› Ermənistanın cinayət ortağı ifşa olundu
››› 40 yaşlı kişi həyat yoldaşını bıçaqlayaraq öldürüb
››› Məsciddə partlayış törədilib, ölənlərin sayı 30 nəfərdən çoxdur
››› Müdafiə Nazirliyi açıqlama yaydı
Son xəbərlər
Bütün xəbərlər »