Mayın 18-də Niderland Krallığının Rotterdam şəhərində “Avroviziya -2021” mahnı müsabiqəsinin birinci yarımfinal mərhələsi keçirilib və Azərbaycanın ifası finala vəsiqə qazanıb.

Ölkəmizi “Avroviziya -2021” mahnı müsabiqəsində “Mata Hari” mahnısı ilə təmsil edən Samira Efendi və onunla komanda şəklində çıxış edən xanımların bayrağmıza qarşı etdiyi hərəkətlər haqlı olaraq sosial şəbəkələrdə müzakirə obyektinə çevrilib. Belə ki, Azərbaycanı təmsil edən xanımlar finala vəsiqə qazandıqlarını eşidər-eşitməz bayrağı ayaqlarının arasına qoyaraq alqışlamağa, daha sonra isə bayrağı divanın üstünə ataraq onun üzərinə çıxıb hoppanıb-düşməyə başlayıblar.

“Açıq-saçıq, nakolkalı, heç bir milli ruhu, savadı, səviyyəsi olmayan “qaqulikləri” kim göndərib ora? Avropaya, xarici ölkələrə, Afrikaya baxıb nümunə götürən, saçlı, saqqallı, hörüklü, sırğalı cavanlarımızın bu səviyyəyə çatmasının günahı bizdədir”.

Bu fikirləri əməkdar incəsənət xadimi, rejissor, ssenarist, aktyor Şeyx Əbdül Mahmudbəyov Bizimyol.info-ya açıqlaması zamanı bildirib. Onun sözlərinə görə, heç bir milli ruhu, vətənpərvərlik hissi olmayan, öz tarixini, keçmişini, dilini bilməyən adamlardan heç nə gözləmək olmaz.

“Bu gün cavanları başlı-başına buraxmışıq. Televiziyalarda lazım olmayan təbliğatlar, verilişlər, lahiyələr göstərilir. Şou biznes adlanan bir dəhşətli, eybəcər sahə var. Burda sənəddən söhbət getmir, ancaq əxlaqsızlıqdan, bədən hərəkətlərindən, eybəcər səsdən, musiqidən söhbət gedir. Başa düşə bilmirsən bu musiqi haranın musiqisidir? Bu nə bədən, baldır, sinə hərəkətləri, nakolkadır? Amma baxırsan, hər şeyləri var. Dünyanı, restoranları gəzirlər, təmtəraqlı həyat tərzləri, maşınları və s. Cavanların da müəyyən bir qismi bunun təsirinə düşür. Bu getdikcə ildırım sürəti ilə yayılır”.

Şeyx Əbdül Mahmudbəyovun vurğulayıb ki, malımıza, mülkümüzə, əxlaqımıza sahib durmalıyıq.

“Dünyada hər bir xalqın tarixinin üç rəmzi var və bunlar bayraq, gerb, vətən sevgisidir. Bəs həmin xanımları o müsabiqəyə göndərəndə niyə başa salmayıblar ki, özlərini necə aparmalıdırlar? İdeoloji təbliğat baxımından onları kim hazırlayıb? Biz əcnəbidən daha çox əcnəbi olmaq istəyirik. Ciddi surətdə özümüzə çəki-düzən verməliyik. O bayrağa görə, canını verən şəhidlər, yarımcan qalan qazilər var. Düşmənlərimiz hara gedirsə, özü ilə milli rəmzləri, bizdən oğurlanma adət-ənənələri ilə gədir. Onlar bizim dilimizi, mədəniyyətimizi oğurlayıb dünyaya meydan oxuyurlar, biz isə gedib olmuşuq əcnəbi”.

Leyla Mirzə