Qarabağ Gündəm Cəmiyyət Hadisə Siyasət Dünya Sağlamlıq Sosial-İqtisadi
Mixail Qusman: “İlham Əliyev Şuşanın azad olunduğunu elan edəndə ağladım”
Mixail Qusman: “İlham Əliyev Şuşanın azad olunduğunu elan edəndə ağladım”

Rusiyanın TASS agentliyi baş direktorunun birinci müavini Mixail Qusman ümummilli lider Heydər Əliyevin anım günü ilə bağlı “CBC” telekanalına müsahibə verib.

Virtuaz.org bildirir ki, həmyerlimiz Mixail Qusman Ulu Öndərlə bağlı xatirələrini bölüşüb, Azərbaycanın Vətən müharibəsində qazandığı parlaq qələbədən danışıb. On yeddi il keçməsinə baxmayaraq, Heydər Əliyevlə ünsiyyətdə olmuş hər kəsin onun xatirəsini qəlbində qoruyub saxladığını vurğulayan görkəmli jurnalist deyib: “Heydər Əliyevi təkcə doğum və anım günlərində deyil, həm də ən müxtəlif məqamlarda, mühüm, məsuliyyətli qərarlar qəbul edərkən xatırlayır, sanki onunla məsləhətləşmişəm. Çünki mənim Azərbaycanda bir insan kimi formalaşmağım Heydər Əliyevin respublikaya rəhbərliyi dövrünə təsadüf edib”.

M.Qusman qeyd edib ki, Heydər Əliyev ikinci dəfə Azərbaycanda hakimiyyətə müharibə dövründə qayıdıb və yoxsul, hətta ən yaxın qonşuları ilə pis münasibətlərdə olan bir dövlətə başçılıq etməli olub. O, öz dəmir iradəsi ilə Azərbaycanı birləşdirməyə, bütün sahələri inkişaf etdirməyə nail olub. Jurnalistin fikrincə, Heydər Əliyevi ən çox narahat edən Dağlıq Qarabağ münaqişəsi idi. “Erməni separatçılarının cinayətkar əməlləri nəticəsində Dağlıq Qarabağ və ətraf rayonlardan yüz minlərlə insan, təkcə azərbaycanlılar deyil, digər xalqların nümayəndələri, eləcə də ruslar yaşadıqları yerlərdən qovulmuşdular. Bu ağrı Heydər Əliyevin ürəyində idi, mən əminəm ki, məhz rəhbərliyə qayıtdıqdan sonra ölkənin yenidən qurulduğu illərdə onun başlıca məqsədi işğal olunmuş torpaqların azad edilməsi, qaçqınların doğma yurd-yuvasına qayıtması idi”, - deyə həmyerlimiz bildirib.

İkinci Qarabağ müharibəsində Azərbaycanın Qələbəsini məhz məntiqi sonluq kimi dəyərləndirən M.Qusman Azərbaycan Prezidenti İlham Əliyev noyabrın 8-də Şuşanın azad edilməsi xəbərini elan edərkən sevincdən göz yaşlarını saxlaya bilmədiyini deyib: “Faşist xislətli separatçılar gözüm görə-görə Vətənimin bir hissəsini işğal edirdilər. Qarabağ müharibəsində mənim yaxın dostlarım da həlak olublar. Odur ki, İlham Əliyev ümummilli lider, atası Heydər Əliyevin vəsiyyətini yerinə yetirərək böyük şərəf hissi ilə Şuşanın azad edildiyini söyləyəndə mən ağladım. Çünki minlərlə həmvətənim üçün bu, ədalətin bərpası, ləyaqət hissinin qaytarılması idi. İndi biz əminik ki, şəhidlərin qanı yerdə qalmadı”.

M.Qusman əmindir ki, Azərbaycan xalqının Vətən müharibəsində Qələbəsini hər hansı təftişə məruz qoymaq istəyənlərin cəhdləri boşa çıxacaq. Azərbaycan öz torpaqları uğrunda döyüşüb, öz torpaqlarından qovulan vətəndaşlarını doğma ocaqlarına qaytarır. Buna görə də Qarabağ savaşı Azərbaycan xalqı üçün Vətən müharibəsi idi. Qarabağın azadlığını özünün başlıca missiyası hesab edən Ali Baş Komandan İlham Əliyev üçün həm də atasının vəsiyyətini yerinə yetirmək çox vacib idi.

Azərbaycanda keçirilən Qələbə paradından danışan Mixail Qusman bildirib ki, həmin gün Azadlıq meydanında hərbçilərin və hərbi texnikanın nümayişini qürurla izləyib. Hətta telefonla çəkdiyi şəkillərin bəzisi TASS agentliyinin fotolentinə düşüb. “Təntənəli marşla meydandan keçən əsgərlərə baxıb düşünürdüm ki, hələ bir neçə gün əvvəl onlar cəbhədə idilər, çoxlarının sinəsində artıq ordenlər də var idi. İkili hisslər keçirirdim. Daha heç vaxt Azadlıq meydanında addımlamayacaq, Qələbə üçün canlarından keçmiş şəhidlərin simasını həmin gün meydanda addımlayan əsgərlərin siması əvəz edirdi”, - deyə həmyerlimiz vurğulayıb.

M.Qusman sonda xatırladıb ki, Azərbaycan və Rusiya prezidentləri İlham Əliyev və Vladimir Putin Dağlıq Qarabağ münaqişəsinin başa çatdığını elan ediblər. O ümidvar olduğunu bildirib ki, Ermənistan rəhbərliyi də bu fikri bölüşəcək, Azərbaycan və Türkiyə prezidentləri İlham Əliyev və Rəcəb Tayyib Ərdoğanın regionda əməkdaşlıq platforması yaradılması barədə təklifləri gerçəkləşəcək və Cənubi Qafqazda, nəhayət, əmin-amanlıq hökm sürəcək.

Son xəbərlər
Bütün xəbərlər »