Qarabağ Gündəm Cəmiyyət Hadisə Siyasət Dünya Sağlamlıq Sosial-İqtisadi
Aqrar komitənin iclasında bir sıra qanunlarda dəyişiklik müzakirə edilib

Bu gün Milli Məclisin Aqrar siyasət komitəsinin iclası olub.

Milli Məclis Aparatının Mətbuat və ictimaiyyətlə əlaqələr şöbəsindən APA-ya verilən məlumata görə, komitənin sədri Tahir Rzayev bildirib ki, gündəlikdə parlamentə bir zərfdə daxil olmuş 4 qanun layihəsi var.

Qeyd olundub ki, həmin qanun layihələrindəki “Torpaq islahatı haqqında”, “Torpaq bazarı haqqında” və “Atçılıq haqqında” qanunlarda, həmçinin Torpaq Məcəlləsində dəyişiklik edilməsinə dair məsələlər Aqrar siyasət komitəsinə aiddir. Təqdim edilmiş qanun layihələrinin hamısı uyğunlaşdırma xarakteri daşıyır və “Əlilliyi olan şəxslərin hüquqları haqqında” 31 may 2018-ci il tarixli qanunun tətbiqi məqsədi ilə hazırlanıb. Adı çəkilən qanunlarda bir sıra terminlər dünya təcrübəsinə uyğun olaraq dəqiqləşdirilib, “əlil” ifadəsi “əlilliyi olan şəxs”, “əlillik qrupu” ifadəsi isə “əlillik dərəcəsi” ifadəsi ilə əvəzlənib; “qüsur” sözü əvəzinə “pozuntu” sözündən, “lal, kar, kor” sözləri əvəzinə “görmə, eşitmə və nitq qabiliyyəti məhdud” ifadələrindən istifadə edilib. Tahir Rzayev vurğuladı ki, əlillik əlamətinə görə ayrı-seçkiliyin bütün formalarının aradan qaldırılması ölkəmizdə yürüdülən dövlət siyasətinin mühüm prinsiplərindəndir.

Müzakirə zamanı deputatlar Eldar İbrahimov, Cavanşir Paşazadə, Novruzəli Aslanov, Azər Badamov, Aydın Hüseynov, İqbal Məmmədov, Eldəniz Səlimov, Müşfiq Cəfərov, Emin Hacıyev, komitənin sədr müavini Sabir Hacıyev rəy və təkliflərini bildirdilər. Çıxışlarda vurğulandı ki, ölkə iqtisadiyyatının və qeyri-neft sektorunun inkişafında aqrar sahənin rolu böyükdür. Müstəqillik dövründə parlamentdə aqrar sahəyə dair 300-ə yaxın məsələ müzakirə olunub, qanunvericilik aktlarının hazırlanmasında deputatlar yaxından iştirak ediblər. Həmin qanunlar ərzaq təhlükəsizliyinin təminatında mühüm rol oynayır.

Fikir mübadiləsində “Hərbi qulluqçuların statusu haqqında”, “Dini etiqad azadlığı haqqında”, “Şəhid adının əbədiləşdirilməsi və şəhid ailələrinə edilən güzəştlər haqqında”, “Çernobıl qəzasının ləğvində iştirak etmiş və həmin qəza nəticəsində zərər çəkmiş vətəndaşların statusu və sosial müdafiəsi haqqında”, “Daxili qoşunların statusu haqqında”, “Veteranlar haqqında”, “Yaşayış yeri və olduğu yer üzrə qeydiyyat haqqında”, “Azərbaycan Respublikası Milli Məclisi deputatının statusu haqqında”, “Torpaq islahatı haqqında”, “Sosial sığorta haqqında”, “Hərbi qulluqçuların dövlət icbari şəxsi sığortası haqqında”, “Məhkəmələr və hakimlər haqqında”, “Əhalinin sağlamlığının qorunması haqqında” və “Xidməti və mülki silah haqqında” qanunlarda dəyişiklik edilməsi vacib sayılıb.

Deputatlar “Uşaq hüquqları haqqında”, “Yol hərəkəti haqqında”, “Azərbaycan Respublikası Milli Məclisinin komitələri haqqında”, “Cinayət prosesində iştirak edən şəxslərin dövlət müdafiəsi haqqında”, “Torpaq bazarı haqqında”, “Qaçqınların və məcburi köçkünlərin (ölkə daxilində köçürülmüş şəxslərin) statusu haqqında”, “Kiçik sahibkarlığa dövlət köməyi haqqında”, “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında”, “Məhkəmə və hüquq mühafizə orqanları işçilərinin dövlət icbari şəxsi sığortası haqqında”, “İnsan orqan və (və ya) toxumalarının transplantasiyası haqqında” qanunlarda və 1997-ci ilin 3 oktyabrında təsdiqlənmiş “Hərbi xidmətkeçmə haqqında Əsasnamə”də dəyişiklik edilməsinə müsbət münasibət bildiriblər.

İclasda “Onkoloji yardım haqqında”, “Ədliyyə orqanlarında qulluq keçmə haqqında”, “Atçılıq haqqında”, “Qeyri-dövlət (özəl) mühafizə fəaliyyəti haqqında”, “Penitensiar müəssisələrdə cəza çəkməkdən azad edilmiş şəxslərin sosial adaptasiyası haqqında”, “Sığorta fəaliyyəti haqqında”, “Könüllü fəaliyyət haqqında”, “Bədən tərbiyəsi və idman haqqında”, “Təhsil haqqında” və “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında” qanunlarda dəyişiklik edilməsi razılıqla qarşılanıb.

Komitə üzvləri Əmək Məcəlləsində, Torpaq Məcəlləsində, Mülki Məcəllədə, Mülki- Prosessual Məcəllədə, Ailə Məcəlləsində, Cinayət Məcəlləsində, Vergi Məcəlləsində, Cinayət-Prosessual Məcəlləsində, Cəzaların İcrası Məcəlləsində, Seçki Məcəlləsində, Mənzil Məcəlləsində, Gömrük Məcəlləsində, Şəhərsalma və Tikinti Məcəlləsində və Miqrasiya Məcəlləsində dəyişiklik edilməsini məqsədəuyğun sayıblar.

Müzakirələrin yekununda baxılan qanun layihələrinin dördü də Milli Məclisin plenar iclasına tövsiyə olunub.

Paylaş »
››› Erməni mayor: “Uşaqlarımızı Azərbaycan ərazisində döyüşməyə buraxmayın” - Video
››› Ermənilərdən Putinə daha bir yalvarış məktubu
››› Milli Qəhrəmanımız doğulduğu torpaqlar uğrunda döyüşlərdə həlak olub
››› Tonoyan Laçının müdafiəsinə şəxsən rəhbərlik etmək üçün Qarabağa gəlib
››› Cəbrayılın işğaldan azad edilən Minbaşılı kəndinin görüntüləri - Video
Son xəbərlər
Bütün xəbərlər »