İspaniya həm koronavirusa yoluxanların, həm də pandemiya üzündən ölənlərin sayına görə dünyada ikinci yerdədir. Virus bütün ölkəni bürüyüb. İndiyə qədər 146 mindən çox ispanda koronavirus aşkarlanıb, 14,5 min vətəndaş həyatını itirib.

Bizimyol.info xəbər verir ki, İspaniyada koronavirus aşkarlanmayan yer var. Kadisdəki Zahara de la Sierra qəsəbəsində heç bir virus daşıyıcısı qeydə alınmayıb. 1526 nəfərin yaşadığı qəsəbədə bunun sirrini gizlətmirlər. Bələdiyyə başçısı Santyaqo Qalvan deyir ki, az qala hər yeri camaşır suyu ilə yuyurlar. Bu işə xeyli insan cəlb olunub. Üç gündə bir dəfə 10 nəfər küçələri yuyur.

Qəsəbənin 5 girişindən 4-ü qapadılıb. Yəni kənar şəxsləri Zahara de la Sierraya buraxmırlar. Bələdiyyə başqanı deyir ki, bu problemin həlli 24 saat dezinfeksiya ilə məşğul olmaqdır. Sakinlərdən Marina S. də belə düşünür. Onun fikrincə, mümkün qədər az təmasda olub, dezinfeksiyaya xüsusi üstünlük verməklə koronavirusdan yan gəzə bilərsiniz.