Neftin bir barrelinin qiyməti son 18 ildə ən aşağı səviyyəyə düşəndən sonra kəskin artım yer alıb. Qiymət artımına səbəb Səudiyyə Ərəbistanı ilə Rusiya arasında gözlənilən razılaşmadır.
Xatırladaq ki, mart ayının əvvəllərində neft nəhəngi olan Səudiyyə Ərəbistanı Kremlə üz tutaraq hasilatı azaltmağa çağırmışdı. Çağırışa əsasən, həm OPEK, həm də Rusiya neft hasilatını azaltmalı idi ki, bazarlarda neftin qiyməti bir qədər qalxsın və bütün bazar iştirakçıları üçün əlverişli həddə yer alsın.
Amma Moskva ərəblərin bu təklifini rədd etmişdi. Ardınca Səudiyyə Rusiyanın acığına neft hasilatını əhəmiyyətli dərəcədə artıracağını və qiymətləri daha da aşağı salacağını bildirmişdi. Elə də oldu. Səudiyyə neft hasilatını artırdı, ardınca dünyada yaşanan qlobal iqtisadi durğunluq neftin qiymətinin son 18 ildə ən aşağı səviyyəyə - bir barrel üçün 19.29 dollara qədər enməsini şərtləndirdi.
Bizimyol.info xəbər verir ki, nəhayət, bir neçə gün əvvəl ABŞ prezidenti Donald Tramp Səudiyyə Ərəbistanı və Rusiyanın hasilatı azaltmaq barədə razılığa gələcəklərini xəbər verəndən sonra neftin qiyməti sürətlə artmağa başladı. Amma tərəflər arasında razılaşmanın baş tutmayacağı ilə bağlı ehtiyatlanma neftin qiymətini cilovlamağa davam edirdi.
Son olaraq Rusiya prezidenti Vladimir Putin hasilatı azaltmağa hazır olduqlarını bildirib. Xatırladaq ki, ötən ayın sonlarında Kreml açıqlama verərək bildirmişdi ki, biz belə iqtisadi savaşlara çoxdan hazırlaşırdıq və geri çəkilməyəcəyik. "Bu oyunda gözünü ilk qırpan tərəf Rusiya olmayacaq",- deyə Moskva Səudiyyəyə qarşı psixoloji hücuma keçmişdi. Amma Səudiyyənin inadından əl çəkmədiyini görüncə, nəhayət, Rusiya "gözünü qırpmağa" məcbur oldu. "Hasilatı 10 milyon barrel - bir az yuxarı-aşağı olmaqla azaltmağa hazırıq",- deyə Putin bildirdi. Bu açıqlamanın ardından neftin qiyməti bir daha yuxarıya doğru sıçrayış etdi və bir barrel üçün qiymət 34,11 dollara qədər yüksəldi.
Qeyd edək ki, hasilatı azaltmaqla bağlı sazişə nail olmaq üçün OPEK və digər neft ixracatçılarının virtual görüşü aprelin 6-na nəzərdə tutulsa da, sonradan görüş ayın 9-na keçirilib. Görüşdə Azərbaycan da iştirak edəcək.