“Liverpul”un misirli futbolçusu Məhəmməd Salah şəxsi həyatındakı hadisələri ictimaiyyətə göstərməyi xoşlamır. Amma hərdən sosial şəbəkələrdə maraqlı şəkillərini görmək mümkündür.

Bizimyol.info xəbər verir ki, onun Milad bayramı ilə bağlı paylaşımı böyük diqqət görüb. Xüsusilə müsəlman azarkeşlər onu tənqid atəşinə tutub. Salahın həyat yoldaşı və 5 yaşlı qızı ilə birlikdə bəzədilmiş şam ağacının qarşısında foto çəkdirməsini bəyənməyiblər.

Məhəmməd Salahın Milad paylaşımı

Məhəmməd, adətən, həyat yoldaşı Magginin şəklini paylaşmazdı. Bu dəfə istisna edib. “Instagram” hesabındakı fotoda Maggi də görünüb. Sosial şəbəkədəki 35 milyon izləyicisindən 2,5 milyonu şəklə münasibət bildirib.

Müsəlman azarkeşləri Salahın Milad bayramını qeyd etməsi xeyli təəccübləndirib. Bundan əvvəl onun cizgi filmi qəhrəmanı Maonanın geyimində foto çəkdirməsi tənqid olunmuşdu.