Qarabağ Gündəm Cəmiyyət Hadisə Siyasət Dünya Sağlamlıq Sosial-İqtisadi
Rusiya “Xəncər”lə hədəfi vurdu

“Beynəlxalq ordu oyunları-2019” çərçivəsində keçirilən “Aviadarts” müsabiqəsində Rusiya aviasiyası ilk dəfə hava-yer tipli uzaqmənzilli “Kinjal” (“Xəncər”) raketini tətbiq edib.

Virtualaz.org xəbər verir ki, ötən şənbə günü, avqustun 10-da keçirilən aviaşoudan “Zvezda” telekanalının yaydığı reportaja əsasən hipersəs sürətli “Kinjal” raketi ilə silahlanmış MiQ-31K qırıcı-bombardmançısı və beşinci nəsil Su-57 qırıcıları “Aviamiks” taktiki epizodu zamanı hücumçu və bombardmançı aviasiyanın hərəkətlərinin “qorunmasını” həyata keçiriblər.

Poliqonda 12 tipdə olmaqla cəmi 60 hədəf quraşdırılmışdı. MiQ-3K təyyarəsindən buraxılan “Kinjal” raketi şərti hədəfləri darmadağın edib.

Rusiya Müdafiə Nazirliyinin təşkil etdiyi “Beynəlxalq ordu oyunları-2019” avqustun 3-də başlayıb. Orada dünyanın 36 ordusundan 5 mindən çox hərbçi iştirak edir. Oyunlar 10 ölkədəki 25 poliqonda keçirilir. Azərbaycan hərbçiləri də oyunlara qatılıb.

Hipersəs sürətli aviasiya zərbə kompleksi “Kinjal” Rusiya prezidenti Vladimir Putinin ötən il ilk dəfə təqdim etdiyi supersilahlardan biridir. Bu raket düşmənin hava hücumundan müdafiə sistemlərinin təsir zonasına daxil olmadan 2 min kilometrə qədər uzaqlıqda hədəflərə yüksək dəqiqlikli zərbə endirməyə imkan verir. Daşıyıcı təyyarə raketi start nöqtəsinə cəmi bir neçə dəqiqəyə çatdırır, “Kinjal”ı buraxır və bazaya geri qayıdır. Raket isə səsdən iti sürətlə və yüksək manevrlərlə hədəfə doğru şığıyır.

Artıq Rusiyanın Cənub Hərbi Dairəsinin qırıcıları “Kinjal” raketləri ilə silahlanıb.

Son xəbərlər
Bütün xəbərlər »