Qarabağ Gündəm Cəmiyyət Hadisə Siyasət Dünya Sağlamlıq Sosial-İqtisadi
Müalicədən sonra gözü tutulan jurnalistdən nazirlik və məhkəmələrə sərt ittiham
Tanınmış jurnalist Qabil Babayev gözündə yaranan problemlə bağlı Yevlax rayon Mərkəzi Xəstəxanasının həkimini, eləcə də məhkəmə sistemini sərt şəkildə ittiham edib.

Bizimyol.info xəbər verir ki, jurnalist Qabil Babayev bildirib ki, 2015-ci ildə övladının əlindəki mobil telefonun onun gözünə dəyməsindən sonra Yevlax rayon Mərkəzi Xəstəxanasında çalışan həkim Məhəmməd Qorçiyevə müraciət edib, o isə səhv müalicə edərək onun gözünün tutulmasına səbəb olub:

Qabil Babayev

"2015-ci ildə 3 yaşlı övladımın əlindəki mobil telefon sağ gözümə dəyib. Bununla əlaqədar olaraq, həmin vaxt işimlə bağlı Yevlax şəhərində yaşadığım üçün Yevlax Rayon Mərkəzi Xəstəxanasında “göz həkim”i işləyən Məhəmməd İsrail oğlu Qorçiyevə müraciət etmişəm. M.Qorçiyev gözümə diaqnoz təyin edib və 2 aylıq resept yazıb. Müalicə bitdikdən sonra yenidən yanına gəlməyi məsləhət görüb. Lakin bu hadisədən bir neçə gün sonra gözüm tutulub. Akademik Zərifə Əliyeva adına Milli Oftalmologiya Mərkəzinin həkimlərinin məsləhəti ilə gözümü Türkiyədə əməliyyat etdirmişəm. Gözümün əməliyat olunmasına və bu günədək müalicənin aparılmasına baxmayaraq, gözümü normal hala qaytarmaq mümkün deyil. Təssüf ki, müvafiq qurumlar bu məsələyə obyektiv yanaşmır, məhkəmələr ədalətsiz qərarlar çıxarır.

Belə ki, M.Qorçiyevin təyin etdiyi səhv diaqnozun nəticəsi olaraq gözümün tutulması ilə bağlı 2016-cı ildə Yevlax Rayon Məhkəməsinə müraciət etmişəm. Yevlax Rayon Məhkəməsi tərəfindən iş Səhiyyə Nazirliyinin Məhkəmə-Tibbi Ekspertiza və Patoloji Anatomiya Elmi-Təcrübi və Tədris Birliyinə ekspertizaya göndərilib. Təssüf ki, ekspertiza tərəfindən iş üzrə həqiqətəuyğun olmayan saxta rəy verilib. Gözümün tutulması əsassız olaraq anadangəlmə problemlərlə əlaqələndirilib. Halbuki, bu hadisəyə kimi heç eynəkdən belə istifadə etməmişəm. Qeyd edim ki, Məhkəmə-Tibbi Ekspertiza və Patoloji Anatomiya Elmi-Təcrübi və Tədris Birliyi tərəfindən rəyin verilməsi 2016-cı ilin sonundan 2018-ci ilin ortaları olmaqla, təxminən 1 il yarım çəkib. Buna səbəb isə Birliyin nümayəndəsi Ziyafəddin Məmmədovla həkim Qurban İsmayılovun bir-biri ilə anlaşa bilməmələri olub. Təsadüfi deyil ki, Birlikdən mənə bir neçə dəfə zəng edərək ekspertizaya çağırsalar da, Q.İsmayılov ekspertizanı keçirməkdən imtina edib. Q.İsmayılov hər dəfə bildirib ki, ekspertizaya bütün lazımi sənədlər və hadisə ilə bağlı həqiqəti üzə çıxaracaq suallar göndərilməyib. Bununla da, gözümün tutulması ilə bağlı M.Qorçiyevin əməllərini ört-basdır etmək istəyirlər. O, isə buna yol verməyəcək. Rəyi doğru suallar alandan sonra yazacaq və M.Qorçiyevin əməllərini üzə çıxaracaq. Birlikdən isə deyiblər ki, rəyin doğru və ya yalan tərtib olunması Q.İsmayılovdan asılıdır. Beləliklə, proses uzanırdı. Bu çərçivədə isə getdikcə Z.Məmmədovla Q.İsmayılovun bu məsələ ilə bağlı münasibətlərinin normallaşdığı hiss olunurdu. Buna baxmayaraq, sonuncu dəfə 2018-ci ilin yayında Q.İsmayılovun yanında olanda o, yenə deyib ki, rəyi yalnız doğru suallar alandan sonra yazacaq. Lakin bu hadisədən bir neçə gün sonra mənə Yevlax Rayon Məhkəməsindən prosesə çağırış gəlib...

Mən buna etiraz olaraq, ekspertizanın yalanlarını üzə çıxarmaqla, işə konkret suallar üzrə yenidən baxılması və təkrar ekspertizanın təşkili üçün Yevlax Rayon Məhkəməsində vəsatətlə çıxış etdim. Təssüf ki, Yevlax Rayon Məhkəməsinin hakimi Vəzirxan Məlikov vəsatəti təmin etməyib və 06.08.2018-ci il tarixində həqiqətlə uyğunlaşmayan, ədalətsiz qətnamə çıxarıb. Daha sonra Yevlax Rayon Məhkəməsinin qərarından Şəki Apellyasiya Məhkəməsinin Mülki Kollegiyasına apellyasiya şikayəti ilə müraciət etmişəm. Təssüf ki, Şəki Apellyasiya Məhkəməsinin hakimi İnşallah Quliyevin verdiyi 21.11.2018-ci il tarixli qərarla Yevlax Rayon Məhkəməsinin ədalətsiz qətnaməsi qüvvədə saxlanılıb. (Yeri gəlmişkən, 1 qətnamədə eyni şəxsin ad və soyadının yazılışında bir neçə dəfə səhv buraxan hakimlər tərəfindən qəbul olunan qətnamələrin obyektivliyinə nə dərəcədə inanmaq olar?)

Bu vaxtadək gözümü müayinə edən bütün həkimlər gözümün M.Qorçiyevin səhv diaqnoz qoyması səbəbindən tutulduğunu bildiriblər və onların bununla bağlı rəyləri var. Onlar bildiriblər ki, M.Qorçiyevin təyin etdiyi diaqnoz və yazdığı resept səhv olub. Əslində həmin vaxt gözüm əməliyyat edilməli olub. Həmçinin, Türkiyədə əməliyyat edildikdən sonra M.Qorçiyevin yanında olarkən o, gözümün özünün səhv diaqnoz qoyması səbəbindən tutulduğunu etiraf edib.

Onu da bildirirəm ki, gözüm tutulandan və əməliyyat ediləndən indiyədək müalicə aparılır. Həkimlərin rəyinə əsasən, bu proses mütəmadi olaraq aparılmalıdır.

Həmçinin, bildirirəm ki, bu, M.Qorçiyevin birinci belə əməli deyil.

Maraqlıdır ki, xəstələrə şəfa vermək əvəzinə, onların sağlamlığına daha ciddi ziyan vuran, səhiyyə işçilərinin adına xələl gətirən və digər bu kimi əməllərə yol verən M.Qorçiyev barəsində heç bir tədbir görülmür, onun fəaliyyəti araşdırılaraq lazımi tədbirlər görülmür. Həmçinin, sual yaranır ki, insanların sağlamlığına daha ciddi zərər vuran, bu vaxtadək etdiyi hərəkətlərə görə cəza almayan M.Qorçiyevin bundan sonra da belə əməllərə yol verməyəcəyinə, insanları şikəst etməyəcəyinə, onları öldürməyəcəyinə kim zəmanət verir?

Təssüf ki, müvafiq qurumlar, xüsusilə də, Ədliyyə Nazirliyi və Səhiyyə Nazirliyi bu suallara aydınlıq gətirmir və bu məsələnin üstündən keçməyə çalışır. Yekun qərarın isə növbəti həftə Ali Məhkəmədə elan olunacağı gözlənilir. Əlbəttə ki, bu qərardan müsbət gözləntim yoxdur. Bu vaxtadək verilən saxta qərarlar, şahidi olduğum proseslər mənə bunu deməyə əsas verir.

Sadəcə məqsədim budur ki, bilməyənlər də bilsinlər ki, heç bir həkim yazdığı reseptə, təyin etdiyi diaqnoza görə, cavabdehlik daşımır. Vətəndaş (xəstə) həkimin qəsdən və ya bilməyərəkdən yazdığı dərmanlardan, təyin etdiyi diaqnoz əsasında aldığı müalicədən şikəst olsa və ya ölsə, buna görə həkimə heç nə deyilmir. Bunu şərtləndirən qanun da yoxdur. Təsadüfi deyil ki, bu gün ən peşəkar vəkillərə belə həkimin səhlənkarlığı, səriştəsizliyi, qəsdi və digər bu kimi amillərlə bağlı baş verən hallarla əlaqədar müraciət olunduqda, onlar belə məsələlərlə bağlı məhkəmələrə müraciət etməyin faydasız olduğunu deyirlər. Niyəsi isə ondan ibarətdir ki, haqlı olsan da, səni haqsız çıxaracaqlar.

Fikrimcə, şəfa vermək əvəzinə xəstələri daha ağır bəlalara düçar edən, onları şikəst edən, öldürən adını “həkim” qoyanların (vicdanlı, peşəkar, işini sevən, xəstəyə pul kimi baxmayan və digər bu kimi yüksək keyfiyyətlərə malik əsl həkimlər nəzərdə tutulmur və onlara böyük hörmət bəsləyirəm) cəzasız qalması ilk baxışda bəziləri üçün sadə görünsə də, çox ciddi məsələdir".

Səsləndirilən iddia və ittihamlara cavab verən Məhəmməd Qorçiyev Bizimyol.info-ya açıqlamasında bildirib ki, jurnalistin yazdıqları həqiqəti əks etdirmir və onun gözündəki problemlərə səbəb onun yazdığı dərmanlar olmayıb:

"İlk öncə demək istəyirəm ki, mən o yazıda qeyd olunanlarla razı deyiləm və mən heç nəyi təsdiq etməmişəm. Yazısında qeyd edir ki, güya mən səhv resept yaxdığımı etiraf etmişəm. Onun məndən tələb etdiyi məbləğ ömrümün axırına kimi məndə olası deyil, olsa da verəsi deyiləm. Mən özümü öldürərəm amma onun dediyi məbləği mən ona verə bilmərəm.

O adam çox narahat insandır. Gözü də anadangəlmə qüsurludur. Hətta bunu ekspertiza da təsdiqləyib. O göz hələ yaxşı ki, az da olsa görür. Anadangəlmə xəstədir həmin insanın gözləri. O xəstə cəmi bir dəfə mənim yanıma gəlib, mən də ona sadəcə göz damcısı yazmışam. Heç ikinci dəfə də gəlmədi yanıma. İkinci dəfə yanıma iddia ilə gəlibdir. Mənim yanımda olmamışdan qabaq da bir neçə həkimə müraciət edib. Özü də deyirdi ki, İrana getdim, Türkiyəyə getdim və s.

Mənim o insanla heç bir problemim olmayıb. Sadəcə özü-özündən problem çıxardıb. Onun gözünə heç peşəkar həkimi demirəm, yenicə universiteti bitirən biri baxsa da görər ki, göz bəbəyinin formasından ona deyə bilər ki, bu anadangəlmə problemdir. Onu lap Amerikaya da, Harvarda da, Oksforda da aparsalar eyni anadangəlmə problem diaqnozu qoyulacaq, əgər qoyulmasa gəlsin mən evimi, hər şeyimi satıb ona verməyə hazıram.

O mənim yanıma gələndə o probleminə görə gəlməmişdi, gəlmişdi ki, gözümə telefon dəyib. Baxdım ki, gözünün ağına yüngülvari qan sızması vardı mən də qan sızmasının çəkilməsi üçün damcılar yazmışam. Demişəm ki, təkrar gəl, gedib amma gəlmədi. 1-2 ay sonra üstümə iddia ilə gəlib. Mən onu nə əməliyyat etməmişəm, nə iynə vurmamışam. Harada görünüb ki, bir damcı göz qidalandırıcısı ilə göz kor olsun? Onun dedikləri həqiqətə uyğun deyil. O adamın məndən nə istədiyini bilmirəm. Heç məhkəməni sayıb gəlmədi də".

Məsələ ilə bağlı digər tərəflərin mövqelərini dərc etməyə hazırıq.

Bizimyol.info

Paylaş »
››› Köhnə avtomobillərin hərəkəti qadağan ediləcək
››› “Bakı səfəri Lavrov üçün gərgin keçəcək”
››› Avropalılar qadağaların aradan qaldırılmasını bayram edir
››› Rusiyada vilayət naziri itkin düşüb - Navalnının zəhərləndiyi xəstəxanada həkim işləmişdi
››› Deputat ailəsi vətəndaşların əmlaklarını əllərindən necə alır: ağlasığmaz üsullar
››› Ölkəyə avtomobil adı ilə metal qırıntıları daşınır
››› Heydər Əliyev: “Qarabağa muxtariyyət verilməsi Azərbaycanın içinə qoyulmuş bomba idi”
Son xəbərlər
Bütün xəbərlər »