Bir neçə gün əvvəl "qara dəlik" nəzəriyyəsi elmi cəhətdən tam təsdiqini tapdı. Belə ki, nəhayət, qara dəliyin fotoşəklini əldə etmək mümkün oldu.
Ardınca Keti Bouman adlı qız bütün dünyada məşhurlaşdı. Məhz kompüter texnoloqu olan Ketinin yaratdığı proqram təminatı qara dəliyin fotosunu əldə eyməyə imkan verib. Bu, tarixdə qara dəliyin ilk fotosudur.
Bizimyol.info xəbər verir ki, fotoşəkildə yer alan mənzərə Yer kürəsindən 500 milyon trilyon (rəqəm uzun olduğuna görə bu formada ifadə olunur) kilometrlik məsafədə yer alıb. Doktor Boumanın yaratdığı proqram əvvəllər mümkünsüz hesab edilən bir təşəbbüsü reallığa çevirib.
O, proqram alqoritmini 3 il əvvəl yazmağa başlayıb. O vaxt xanım Bouman Massaçusets Texnologiya İnstitutunda magistratura təhsili alırdı.
Qara dəliyin ilk fotosu Event Horizon Teleskopu vasitəsilə əldə edilib. Bu teleskop 8 teleskopu özündə birləşdirən şəbəkədir. Teleskopların əldə etdiyi təsvirləri birləşdirib qara dəliyin fotosunu çıxarmağa isə məhz Boumanın proqramı imkan verib.
Foto yayıldıqdan az sonra Keti Bouman dünyaca məşhur simaya çevrilib və bütün sosial şəbəkələrdə trendə çevrilib.