Qarabağ Gündəm Cəmiyyət Hadisə Siyasət Dünya Sağlamlıq Sosial-İqtisadi
“Bacım qolundan ciddi yara alıb, sümüyü çatlayıb”
Bakıda çağırışa gedən təcili tibbi yardım stansiyasının işçilərinin sərxoş şəxslər tərəfindən döyüldüyü xəbər yayılsa da, xəstə yaxınları bunun əksini iddia edir. Qeyd edək ki, iyulun 15-də “Pion Palace”ın həyətində qeydə alınan hadisə barədə yayılan məlumatda bildirilirdi ki, gecə yarı 7 saylı Təcili və Təxirəsalınmaz Tibbi Yadım Stansiyasının əməkdaşları olan həkim Aynurə Şamilzadə və feldşer Günay Həziyeva çağırış üzrə restoranların birinə gediblər. Tibb əməkdaşlarının mətbuata verdikləri açıqlamaya əsasən, xəstə içkinin təsirindən şok vəziyyətdə olub. Yaxınları isə onun xəstəxanaya aparılmasına qarşı çıxıb və mübahisə də bu səbəbdən baş verib. Tibbi briqadanın həkimlərinin dediyinə görə, içkili vəziyyətdə olan xanıma yardım etmək istəyən zaman bir neçə nəfər onlara xəsarət yetirib: “Mən feldşerə göstəriş verdim ki, xəəstəyə yardım göstrəsin. Xəstənin ətrafında bir neçə nəfər sərxoş vəziyyətdə idilər. Təhqiredici, nalayiq sözlər deməyə başladılar. Xəstəyə yardım göstərməyimizə mane oldular. Sonra isə, bizi təhqir edərək əl-qol atmağa başladılar. Bizi döydülər. Xəsarəti bizə yetiriblər”.

Xətai rayon 7 saylı Təcili və Təxirəsalınmaz Tibbi Yardım Stansiyasının əməkdaşları sonradan adlarını bildikləri Salmanova Günel Elman qızı və Elvin adlı şəxsdən aidiyyatlı orqanlara şikayət ediblər.

Xəstə təkzib edir: həkimlər bizi döyüblər

Lakin qarşı tərəf, xəstə Salmanova Nuriyyə Elman qızı “Yeni Müsavat”a gələrək olanları təkzib edib. Şikayətçinin sözlərinə görə, həkimlərin döyülməsi tamamilə yalandır. Əksinə, xəstənin yaxınlarına təzyiq göstərilib: “İyulun 15-də restoranların birinə sünnət toyuna getmişdik. Təxminən saat 11 radələrində restorandan çıxdıq. O anda halım pisləşib, yıxılmışam. Yaxınlarım və tanışımız olan Elvin təcili tibb yardım çağırıblar. Həkimlər iki dəfə mənə iynə vurub, təzyiqimi ölçüblər. Bununla da işlərini bitmiş hesab edərək getmək istəyiblər. Lakin özümə gəlmədiyimi görüb yaxınlarım tələb ediblər ki, məni xəstəxanaya aparsınlar. Tibb əməkdaşları isə bildiriblər ki, mənim kimi xəstəni xəstəxanaya aparmaq üçün səlahiyyətləri yoxdur, qanun buna icazə vermir. Bizimkilər də vəziyyətim ağır olduğu üçün narazılıq ediblər. Lakin həkimlər dirəniblər ki, aparmayacağıq. Təsəvvür edin ki, təcili tibbi yardım maşınının sürücüsü mənə görə xərəyi düşürüb, həkimlər də buna qəzəbləniblər ki, kim sənə icazə verdi ki, xərəyi düşürəsən!”.

“Bacım qolundan ciddi yara alıb, sümüyü çatlayıb”

Şikayətçinin sözlərinə görə, təcili tibbi yardım əməkdaşları mübahisə zamanı bacısı Günel Salmanovanı itələyiblər. Nəticədə bacısı qolundan ciddi xəsarət alıb: “Mübahisənin sonunda tibb əməkdaşları məni xəstəxanaya aparmağa razılaşıblar. Bu zaman bacım təcili tibbi yardım maşınında mənimlə getmək istəyib. Lakin həkimlər buna mane olub və bacımı maşından yerə itələyiblər. Bacım qolundan ciddi yara alıb, sümüyü çatlayıb. Hazırda bacımın qolu gipsdədir və bu barədə tibbi ekspertizadan keçib. Beləliklə, maşına bizim ailəmizin tanımadığı bir restoran işçisini götürərək məni xəstəxanaya aparmaq adı ilə hadisə yerini tərk ediblər”.

Şikayətçi bildirib ki, həkimlər onu şok vəziyyətində xəstəxana adı ilə 34 saylı polis bölməsinin qabağına atıblar: “Məni apardıqdan sonra ailəmiz bütün xəstəxanalarda məni axtarıblar. Həmin vaxt şok vəziyyətində olduğumdan olanlardan xəbərsiz olmuşam. Elə bu vəziyyətdəcə həkimlər məni xəstəxanaya aparmaqdansa polis bölməsinin qabağına atıblar. Məni ərazidəki skamyanın üstünə qoyublar. Deyilənə görə, bir neçə dəfə skamyadan yıxılmışam, yalnız polislərin köməyi ilə məni yerdən qaldırıblar. Ayılanda onu gördüm ki, polis məndən yaxınlarımın telefon nömrəsini istəyir. Təsəvvür edin ki, həkimlər mənə yardım etmək əvəzinə, köməksiz vəziyyətimdə məni aparıb 34 saylı polis bölməsinin qabağına atıb. Bu hansı qanunda, insanlıqda yazılıb?!”

“Elvin barəsində 3 aylıq həbs-qətimkan qərarı çıxarıldı”

Şikayətçi olayla bağlı aparılan istintaq haqda da danışıb: “Olaydan sonra bacımı və məni istintaqa çağırdılar, ekspertizadan keçdik. Elvinin isə izahatını alan kimi həbs edib 48 saatlıq cəza verildi. Daha sonra iş prokurorluğa göndərildi və Kürdəxanıda yerləşən təcridxanaya aparılaraq barəsində 3 aylıq həbs-qətimkan qərarı çıxarıldı. Hazırda Elvin heç bir günahı olmadan təcridxanadadır. Həkimlər iddia edir ki, guya döyülüb, sağ qolu sınıb. O tibb bacısının qolu necə sınıb ki, saatlarla polis bölməsində 4-5 səhifəlik izahatlar yazıb. Amma mənim bacımın qolu sındığından, o öz izahatını yaza bilmədi, yerinə mən yazdım. Yalnız imza yerinə birtəhər qol çəkə bilmişdi. Bizim ailə üzvlərimizdən heç kəs həkimlərə xəsarət yetirməyib, bu yalandır. Üstəlik, lap tutaq ki, mən içkili olmuşam, hansı qanunda yazılıb ki, həkim şok vəziyyətində olan xəstəni xəstəxana adı ilə polis bölməsinin qabağına atıb getsin?”

Səhiyyə Nazirliyi: təzyiqə məruz qalan tibb işçiləridir

Məsələ ilə mövqe öyrənmək üçün Bakı Şəhər Təcili və Təxirəsalınmaz Tibbi Yardım Stansiyasına sorğu ilə müraciət etdik. Baş həkimin müavini Murad Mirzəzadə Bizimyol.info saytına bildirib ki, bu barədə açıqlama vermək Səhiyyə Naziryilyinin səlahiyyətindədir.

Səhiyyə Nazirliyi mətbuat xidmətinin rəhbəri Liya Bayramova isə Bizimyol.info saytına açıqlamasında deyib ki, fiziki təzyiqə məruz qalan 7 saylı Təcili və Təxirəsalınmaz Tibbi Yadım Stansiyasının əməkdaşlarıdır. “Bununla bağlı polisdə araşdırma aparılır və məsələyə hüquqi qiymıt veriləcək”.

DİN: “Məsələyə hüquqi qiymət veriləcək”

Daxili İşlər Nazirliyi Mətbuat xidmətinin şöbə rəisi İlham Babayev Bizimyol.info saytına bildirib ki, hadisə ilə bağlı Xətai rayon Polis İdarəsinin İstintaq Şöbəsində cinayət işi başlanılıb. “Hazırda istintaq getdiyi üçün təfərrüat barədə məlumat verilə bilməz.Tam obyektiv və hərtərəfli araşdırma aparıldıqdan sonra məsələyə hüquqi qiymət veriləcək” – deyə İ.Babayev bildirib.

Rəşad VAQİFOĞLU

Paylaş »
››› "Dərə xəlvət" və ya Cavid Qurbanova niyə "dayan" deyən yoxdur...
››› Siqareti necə tərgitmək olar...
››› "Döyüşə gedəndə nə bələdiyyəni, nə də icra aparatını fikirləşdim"
››› Yeni Avrasiya kiminlə və necə qurulur?
››› Yeni nazir müavinləri kimlərdir... - Dosye
››› Böyük Britaniya ordusu Rusiya sərhədlərinə yaxınlaşır: "Bu, hücum istəyinə işarədir"
››› Sabah iki rayonda qaz təchizatı müvəqqəti dayandırılacaq
Son xəbərlər
Bütün xəbərlər »